344. De s. Thoma Cantuariensi.

1 a. Ad honorem summi regis
Defensorem suae legis
Collaudet ecclesia.

1b. Post tenebras et maerorem
Fit in plausum et splendorem
Thomae tolerantia.

2 a. Hunc natale verbi Dei,
Cuius verbum causa rei,
Misit ad supplicia.

2 b. Fervet furor militaris,
Sacro gradu, sacris aris
Non arcetur framea.

3 a. Cum nascente Christo stratus
Ornat festa tanti status
Sanguinis in laurea.

3 b. Stephano concoronatus,

Cum Iohanne Christo gratus,
Innocentum assecla.

4 a. Fraus et virtus conflixere,
Spinae rosam contrivere,
Ius pressit iniuria.

4 b. Sed iam pressit quae pressere,
Transit hiems orto vere,
Vernat signis Anglia.

5 a. Est asilum hic salutis

Claudis, caecis, surdis, mutis
Thomae sanctimonia.

5 b. Laesos lenit et languentes
Procul suos et praesentes
Martyris memoria.

6 a. Febris fugit, virus cedit,
Lepra sordens sospes redit
Thomae per suffragia.

6b. Hi insomnes, bi sopiti
Sancti signis insigniti
Reportant remedia.

7 a. Erubesce, pars adversa,
Quae mersisti, iam emersa
Clare micant lumina.

7 b. Rode livor et irrita,
Oleum ne natet ita
Nulla cogent flumina.

8 a. Pastor morum, flos pastorum,
Spes Anglorum, crux errorum,
Zeli Dei victima,

8 b. Pestes pelle, vis acerva,
Clerum rege, plebem serva
In pace catholica.

9. Hoc det eius clementia,
Thoma, per tua merita,
Cum quo regnas in saecula.