345. De S. Thoma Cantuariensi.

1 a. Circa fines occidentis
Stellae iubar refulgentis
Mundi profert vespera,

1b. Habent Indi suum Thomam,
Thomam gentes circa Romam,
Iugis flammae sidera.

2 a. Inter quorum passiones,
Et ascriptas regiones
Ipsis ad martyrium,

2 b. Ortus diem, locum mortis,
Laureatae dux cohortis
Servat sibi medium.

3 a. Illi pars terrarum prima,
Huic extremum servit clima,
Christus est in medio.

3 b. Item huius et illius
A natali post et prius
Aeque distat passio.

4 a. Hos athletas, hos tirones
Post tormenta, post agones
Coronavit Dominus.

4 b. Ambo fortes agonistae,
Visione tua, Christe,
Perfruuntur cominus.

5 a. Felix Thomas, cui latus
Apud Indos rex iratus
Fodi iussit gladio !

5b. O beatum, o felicem

Nostram Thomam, cui cervicem
Laceravit pugio !

6 a. Ergo regis et tironum
Consonare erit bonum
Laudes et praeconia,

6 b. Ut dierum et locorum,
Ita vocum et votorum
Triplex sit harmonia.

7 a. Quorum trium tria festa
Patriasque manifesta
Conectit proportio;

7 b. Laude trina collaudemus,
Et tres uno copulemus
Simul in consortio.

8 a. Iungant preces isti duo
In conspectu, Christe, tuo,
Quorum laudes iungimus,

8 b. Ne requiras in furore,
Quicquid acta, mente, ore,
Coram te deliquimus.