346. De s. Thoma Cantuariensi.

1 a. Dulce melos voce clara
musica
prome symphonia,

1b. Prosequendo laude pia
triumphi
Thomae insignia ;

2 a. Quem non flectunt ira, vis,
nec framea
a veri constantia;

2b. Fidem factam denudat
fraus detecta
in viri victoria.

3 a. Hunc pro legis
relegavit doctrina
Rex cum suis
et vitae disciplina,
Quem exsulantem
pro iustitia
gaudens suscepit Gallia;

3b. Sex implevit

annos Christi athleta,
Contra regis
dimicando decreta,
Qui revocatus
sub fiducia
punitur in ecclesia.

4 a. Quam saeva manus, quam dura,
tam pia effundens
viscera !

4 b. Contra legem atque iura
datae pacis solvis
foedera.

5 a. Rachel luxit desolata
filiorum praesidia,

5 b. Et post luctum consolata
natis iam pandit atria.

6 a. Letum gaudia
parit, moeror
solatia ;

6 b. Nam laude condigna
coruscant
miracula.

7 a. Caecis visus redit,
insanis

mens effugata,
Patet auris surda,
lepra cedit mundata,
Febris fugit
labefacta,
firmantur
vestigia.

7 b. Mors tacet sepulta,
extinctis
datur vita,
Et, res dictu mira
et prius inaudita,
Mutilato
nam lumina
redduntur
et propria.

8 a. Hiis gaude
redimita,
Christi sponsa
ecclesia ;
et luge pars
adversa;

8 b. Nos, Thoma,
Deo commenda
prece pia,
cum quo vivis
in superna
patria,

9 a. Ut persolvamus
cantica

9 b. Tecum Christo per
saecula

10. Decantantes Alleluia.