348. De s. Thoma Cantuariensi.

1 a. Gratulantes celebremus

Festum Thomae et cantemus
Martyris praeconia.

1b. Ab electis est electus,

Thomas martyr est effectus:
Gaudeat ecclesia,

2 a. Pro qua mori non negavit
Sed se morti praesentavit
Miranda constantia.

2 b. Praesul sacer exsulavit,
Tandem tutus remeavit
Pacis cum fiducia.

3 a. Est in alvo matris natus
Miro modo cruciatus
Hostium nequitia.

3 b. Hic est factus martyr Dei,
Cuius novit modum rei
Tota caeli curia.

4 a. Est cruore dedicata
Nati mater et lustrata
Martyris praesentia,

4 b. Quinta die a natali
Dei martyr a mortali
Migravit angustia.

5 a. Tam festivae cur diei
Non pepercit hostis Dei,
Omni plenus furia?

5 b. Hostes martyr non timebat
Sed pro Christo se tradebat
Mortis ad supplicia.

6 a. Omnis terra gratuletur,
Festum Thomae veneretur,
Sed prae cunctis Anglia,

6 b. Quae nutrivit virum tantum,
Mitem, pium, castum, sanctum,
Dignum caeli gloria.

7 a. Mundum spernens elevatur
Et cum sanctis collocatur
In caelorum patria.

7 b. Hic dum caelis inhiabat,
Sacrum corpus macerabat
Rerum abstinentia.

8 a. Pauper fuit et egenus,
Licet buius mundi plenus
Esset opulentia.

8 b. Huius viri sanctitatis,
Huius rei veritatis
Haec sunt testimonia.

9 a. Plures aegri restituti
Adoptatae sunt saluti
Divina potentia;

9 b. Caeci facti sunt videntes,
Claudi recte gradientes,
Lepra fugit anxia.

10 a. Ergo, martyr, te precamur,
Cuius festum veneramur
Dignum reverentia,

10 b. Ut pro nobis ores Christum,
Ut perducat chorum istum
Ad caelorum gaudia.