349. De s. Thoma Cantuariensi.

1 a. Mundo Christus oritur,
Pax in terra canitur,
In excelsis gloria ;

1 b. Thomas Christo nascitur
Dum pro Christo patitur
Inter haec sollemnia.

2 a. Quinta natalitii
Huius est martyrii
Dies plena gaudio.

2 b. Gaudet hinc ecclesia,
Gaudet caeli curia
Tanto laeta socio.

3 a. Felix martyr usquequaque

Vita clarus in utraque

Dignitatis gratia ;

3 b. Dum in mundo sublimatus
Est honore praesulatus
Et in caelis gloria.

4 a. Causa, locus, si quaeratur
Pro qua, vel quo sic caedatur
Deo placens hostia;

4 b. Causa Christus invenitur,
Pro quo pugnat et punitur,
Locus est ecclesia.

5 a. Ara crucis tulit Christum,
Ante aram caedit istum
Ense manus impia ;

5 b. Christus spinis coronatur,
Huic corona vitae datur
Caesa transitoria.

6 a. Causa, poena, locus poenae
Si pensetur, in hoc plene
Plenum est martyrium.

6 b. Ornat virtus sanctum Dei,
Sanctitatis ferunt ei
Signa testimonium.

7 a. Caeci vident, muti fantur,
Lepra fugit, et curantur
Cuncta morbi genera ;

7 b. Sed et magis honoratur
Quod defunctis vita datur
Eius ope supera.

8 a. Sana, martyr, sacra prece
Nos a morbo, nos a nece
Donans vitae praemia,

8 b. Ut te duce consequamur
Vitae donum, et ducamur
Ad aeterna gaudia.