352. De s. Thoma Cantuariensi.

1 a. Sol in stella triumphavit,
Stella solem revelavit
Mundi diffidentiae,

1 b. Quae [est] in spem transformata
Gratia, sed gratis data
Divinae clementiae.

2 a. Sole Christus figuratur,

Stella Thomas [desig]natur;
Nam mater ecclesia,

2b. Quae iam fuit desolata,
Modo viret recreata
Martyris constantia.

3 a. Thomas Christi sub figura
Desperatis ad futura
Dat invitatorium.

3b. Quaesuntbaec?etquosinvitat?

Vita perpes, et qui vitat

Mundi transitorium.

4 a. Quaeris adhuc, qui vocentur?
Omnes Dei qui censentur
Conformes imagini.

4b. Sunt gentiles an Iudaei?
Non tantum, sed omnes rei
Sunt vocati Domini.

5 a. Murmurat hinc pharisaeus,
Tamen ascendens Zacchaeus
Contemplatur Dominum.

5 b. Hoc exemplo non desperet,
Sed in bono perseveret
Omne genus hominum.

6 a. Ad hoc bonum quis accedit ?
Omnis, qui perfecte credit
Iesum Dei filium.

6 b. Caecus hic illuminatus
Credit et est advocatus
In Christi collegium.

7 a. T[homas reus] iudicatus
Fit reorum advocatus,
Thomas est a Deo datus
Pereunti saeculo.

7 b. Ergo, martyr pretiose,
Sancte Thoma gloriose,
Funde preces fructuose
Pro devoto populo.

8. Amen dicant omnia.