354. De s. Thoma Herefordensi.
In festo depositionis.

la. Magnae lucem caritatis,
Mirae ducem veritatis,
Hominem angelicum

1b. Collaudantes veneremur,
Operantes imitemur
Thomam apostolicum.

2 a. Ob amorem paupertatis
Apostolum sequitur,
Ob fervorem caritatis
Martyri coniungitur;

2 b. In fide confessionis

Primum Thomam sequitur,
Et in zelo passionis
Secundum amplectitur.

3 a. Aemulator sanctae vitae,
In Christo fecunda vite
Insertus fructificat ;

3 b. Exquirens in corde toto
Cum ferventiori voto
Subditos purificat.

4 a. Virgula iustitiae

Cecidit iniquos ;
Mundos aqua gratiae
Fovit et pudicos;

4 b. Iugo temperantiae

Pressus est amore,
Ut in throno gloriae
Rutilet splendore.

5 a. O miranda sanctitas,
Per quam Christi pietas
Sic mundo profecit,

5 b. Nam mutus et caecitas,
Gutta, claudus, surditas
Et gibbus defecit.

6 a. Per Thomam morbus curatur,
Et a carne mors fugatur,
Datur vitae spiritus ;

6 b. Ergo, pater, te precamur,
Ut laxetur quo gravamur,
Donis datis caelitus.