370. De sancta Wenefreda.

1 a. Gaude, virgo Wenefreda,
Vitiorum spernens foeda
Sancto plena flamine.

1b. Gaude, precor, virgo pura
Cui nulla fuit cura
De carnis propagine.

2 a. Gaude, quia non incestum,
Sed ferventer amans Christum,
Passa es opprobria.

2 b. Gaude, quod te decollavit
Et ad terram corpus stravit
Ense manus impia.

3 a. Gaude, quod fons de tellure
Mox erupit aquae purae
Ubi caput cecidit.

3 b. Gaude, quia te caedentem
Ensem herbaque tergentem
Terra mox absorbuit.

4 a. Gaude, quod te plebs deplorat,
Sed Beunous fidens orat
Caelum pulsans fletibus.

4b. Gaude, quod is coaptavit
Caput trunco et sanavit
Cunctis intuentibus.

5 a. Gaude, quod resuscitata
Statum agis ut beata
Sacrum velum induens.

5 b. Gaude, quod es ancillarum
Christi facta plurimarum
Mater illas imbuens.

6 a. Gaude, quia hac in vita
Te dilexit Christus ita
Quod fulsit miraculis.

6 b. Gaude, quia ante fatum
Quisquis dixit se beatum
Qui te vidit oculis.

7 a. Gaude, quia collum cingit
Ictas ensis qui non fingit
Sed te probat martyrem.

7 b. Gaude Venefreda (hinc es) dicta
Martyr constans, et non ficta
Servans hunc characterem.

8 a. Gaude, quia silex fortis
Usque modo tuae mortis
Pandit testimonium.

8b. Gaude, quia suo more
Adhuc rubet de cruore
Fontis per diluvium.

9 a. Gaude, virgo Deo grata,
De longinquo post translata
Ad urbem Salopiae,

9 b. Gaude, quod te devotarum
Ibi coetus monachorum
Collaudant quotidie.

10 a. Gaude modo, Venefreda,
Sancta Deo placens, reda
Caelo vehens animas.

10 b. Gaude, quia gratulantur
Omnes qui te venerantur
Circum per provincias.

11a. Gaude, quia iam cum Deo
Gratularis, et in eo
Tuum constat gaudium.

11b. Te rogamus omnes ergo,
Dona nobis, pia virgo,
Salutem et gaudium.