371. De sancta Wenefreda.

1 a. Virgo vernans velut rosa,
Agni sponsa speciosa,
Christi martyr pretiosa,
Wenefreda floruit.

1b. Ex Britannis oriunda,
Fide firma, spe iucunda,
Actu sancta, mente munda,
Mundi menda caruit.

2 a. Hanc occidit Karadocus,
Quem mox sorbet orci focus,
Qui pravorum exstat locus
Quo Sathan exuritur.

2 b. Huius argumento rei
Fons ebullit nutu Dei
Rubricatae speciei,
Quo caput praeciditur.

3 a. Mira multa hic patrantur,
Caeci vident, muti fantur,
Morbi omnes effugantur
Cum fide petentium.

3 b. Gloriosa Wenefreda,
Maris nobis fluctus seda,
Ne fiamus hosti praeda,
Fer, pia, praesidium.