373. De sancto Wilfrido.

1 a. Salvatoris clementiae

Dulcem pangat harmoniae
Modalum ecclesia,

1b. Qui in sanctis mirabilis
Est et mundo placabilis
Horum per suffragia.

2 a. Hic est paterfamilias,

Qui mnas servis dans singulas
Profecturus peregre,

2b. Pro talentis geminatis
Praemium fidelitatis
Stolam reddit gloriae.

3 a. Gloriatur hac indutus
Wilfridus in caelestibus,

3 b. Lapis domo collocatus
Caelesti decentissimus.

4 a. Hic est lapis amplexandus
Velamen non habentibus,

4 b. Prece tollens culpae pondus
Et induens virtutibus.

5 a. Quod in terris meruit
Innumeris claruit
Per orbem miraculis,

5 b. Quae Christus exhibuit
Cui esse studuit
Placens sine maculis.

6 a. Confirmari dum defertur,
Obit infans, et offertur
Suscitandus praesuli ;

6 b. Suscitatus confirmatur,
Et post annos mancipatur
Obsequio Domini.

7 a. Vir ex alto labitur
Et defunctus creditur
Artubus attritis,

7 b. Sed mors statim pellitur,

Et vir sanus redditur

Tactu pontificis.

8 a. Est et morbis aliis
Salus data plurimis
Eiusdem precamine,

8 b. Cuius Christus precibus
Vero in caelestibus
Nos illustret lumine.