378. De sanctis Evangelistis.

1 a. Iubilemus salvatori,

Quem caelestes laudant chori
Concordi laetitia.

1b. Laudes evangelistarum
Sub figuris scripturarum
Recolit ecclesia.

2 a. Hi sunt eius fundamenta,
Fundatores, fulcimenta,
Bases, epistilia,

2b. Idem sagaque cortinae,
Pelles templi iacintinae,
Cippi, spherae, lilia.

3 a. Hi sunt nubes coruscantes,
Terram cordis irrigantes
Doctrinarum pluvia.

3 b. Hi praecones novae legis
Et ductores novi gregis
Ad Christi praesepia.

4a. Isti montes appellantur,
Ipsi prius illustrantur
Veri solis lumine.

4b. Mira virtus est eorum,
Firmamenti vel caelorum
Designantur nomine.

5 a. Fugam morbis imperant,
Leges mortis superant,
Effugant daemonia,

5 b. Delent idolatriam,
Reis praebent veniam,
Miseris solatia.

6 a. Horum nutu cedat error,
Crescat fides, absit terror
Finalis sententiae,

6b. Ut soluti a delictis
Sociemur benedictis
Ad tribunal gloriae.