379. De sanctis Evangelistis.

1 a. Laus devota mente
Choro concinente

Christo sit cum gloria,

1b. Qui evangelistas
Veri dogmatistas
Insignivit gratia;

2 a. Quique suo more
Lucem ex fulgore

Dat per orbis climata,

2 b. Tales dum elegit
Per quos iam subegit
Haereses et schismata.

3 a. Hi bis bini fontes
Valles atque montes
Irrigantes flumine,

3 b. Orti paradiso,
Mundum indiviso
Illustrantes familie.

4 a. Illos per bis bina
Visio divina
Signat animalia,

4b. A quibusdam visa
Formis tunc divisa
Gestu sed aequalia,

5 a. Pennis decorata
Terris elevata
Cum rotis euntia,

5 b. Facie serena
Oculorum plena
Verbi Dei nuntia.

6 a. In bis possunt cerni
Annuli quaterni

Quibus archa vehitur,

6 b. Quorum dogma sanum
Per Samaritanum

Circumquaque seritur.

7 a. Tali quasi plaustro
Mulier ab austro
Salomonem adiit,

7 b. In hac ceu quadriga
Agnus est auriga
Qui pro nobis obiit.

8 a. Istis in bis binis
Caput est et finis

Christus complens omnia.

8 b. Horum documentis,
Horum instrumentis
Florens stat ecclesia.

9 a. Horum nos precatu
Mortis a reatu

Solvat Christi gratia,

9 b. Horum ut doctrina
Virtus nos divina
Ducat ad caelestia.