384. De sanctis Martyribus.

1 a. Sancti regna devicerunt,
Fide iusta compleverant,
Repromissis additi,

1b. Stringunt ora leonina,
Exstinguentes vi divina
Viri focos incliti.

2 a. Effugati sunt mucrones,
Sani surgunt ut tirones,
Fortes stant in proelio.

2 b. Castra vertunt exterorum,
Consolatur filiorum
Matres resurrectio.

3 a. Quidam membris sunt distenti
Nullo liberante tenti
Ut resurgant clarius.

3 b. Actus probra sunt experti,
Carceres et vincla, certi
Se salvari citius.

4 a. Isti secti, lapidati,

Sunt temptati, trucidati,
Puncti, caesi gladiis.

4 b. Circuibant in melotis
Digniores turbis totis
Squalentes angustiis,

5 a. In desertis oberrantes,
In cavernis latitantes,
Speluncis et montibus,

5 b. Hi probati fide vera
Gaudent visione mera;
Nos, rex, iunge talibus.