389. De sanctis Confessoribus.

1 a. Almi Christi confessores,
Viae duces, formatores
Morum, legis aemuli,

1b. Mundi fastus aspernantes,
Carnis luxus refraenantes,
Sponte crucis baiuli,

2 a. Quod terrenum abdicabant,
Ad superna suspirabant
Profluentes fletibus.

2 b. Faciebant et docebant
Vita, verbo propellebant
Fulgentes virtutibus.

3 a. In scripturis declarandis
Vigilabant, gubernandis
Ad salutem populis:

3 b. Ordines instituerunt,
Quidam cellis latuerunt
Grati Dei oculis.

4 a. Rite sic varietate
Famulantes caritate
Sunt inventi mutua.

4 b. Fac ut verbis informemur
Et exemplis reformemur
- Ope, Deus, congrua.