392. De sanctis Confessoribus.

1 a. Vos electi confessores,
Vos pastores et doctores
Totius ecclesiae,

1b. Exseratis nobis flores,
Florum fructus et odores
Verae sapientiae.

2 a. Vos in fontes per torrentes

Prophetia producentes

Et legis duritiam

2 b. Effudistis aquas mundas,
Aquas vivas et fecundas,
Et caelestem pluviam.

3 a. Vos invicti bellatores

Propter fidem, propter mores,
Contra mundi principes,

3 b. Sectas, leges perfidorum
Impugnastis et eorum
Doctrinae participes.

4 a. Vos doctrinae verae bullam
Veritatis et medullam
Revelastis parvulis.

4 b. Vos errantes et arentes
Refecistis pias mentes
Scripturarum rivulis.

5 a. Ergo nos caelesti rore
Perfandatis et odore
Supernae dulcedinis.

5 b. Lac cum melle propinetis,
Nobis clausas reseretis
Portas veri luminis.