393. De sanctis Doctoribus.

1 a. Omnis terra, quae repletur
Doctrinis catholicis,
Praesens festum veneretur
Laudibus mirificis,

1b. Sic vox nostra societur
Superis hymnidicis,
Ubi doctor hic fovetur
Fomentis angelicis.

2 a. Hic virtutum est quadriga
Quibus sursum vehimur,
Rota simul et auriga
Est qua Deo iungimur.

2 b. Aura spirans, mare, sidus,
Per quae duci nitimur,
Navis, nauta, portus fidus
Vitae quam adtrahimur.

3 a. Archam Noe construit
Contra cataclismum,
Hic constructam instruit
Contra paganismum.

3 b. Ioseph quondam destruit
Famis paroxismum,
Iste semper astruit
Vitae sabbatismum.

4 a. Lactat matrem filius

Contra mundi morem,
Replet mare fluvius,
Terra fudit rorem.

4b. Stellae mundi radius

Lunae dat splendorem,
Docto hic egregius
Dogmatis nitorem.

5 a. Elephanti dat natare
Scripturarum is in mare
Sed agnae suppeditas,

5 b. Quae sit inde longitudo,
Profundum et latitudo
Docens et sublimitas.

6 a. Prece cuius et doctrina
Perfruamur te, divina
Supremaque deitas,

6 b. Ut hoc docti cum doctore
Conregnemus in dulcore
Regni quod inhabitas.