1334 Acta Apostolicae Sedis - Commentarium Officiale

Ob sanctitatis famam, Causa beatificationis et canonizationis apud Cu-

riam Archiepiscopalem Sancti Germani in urbe Rimouski inita est per ce-

lebrationem Inquisitionis dioecesanae anno MCMXCIV, cuius auctoritatem et

vim iuridicam Congregatio de Causis Sanctorum die IX mensis Decembris

eodem anno probavit. Positione confecta, die XXVII mensis Novembris anno

MMI habita est Sessio Consultorum Historicorum et die XXVII mensis Aprilis

anno MMXII in Congressu Peculiari Consultorum Theologorum prospero cum

exitu disceptatum est, iuxta consuetudinem, an Serva Dei heroice virtutes

christianas exercuisset. Patres Cardinales et Episcopi in Sessione Ordinaria

diei I mensis Octobris anno MMXIII coadunati, professi sunt Servam Dei vir-

tutes theologales et cardinales iisque adnexas in modum heroum exercuisse.

Beatificationis gratia, Causae Postulatio iudicio Congregationis de Causis

Sanctorum assertam subiecit quandam Venerabilis Servae Dei intercessioni

tributam miram habitam sanationem, quae in Canada evenit. De hac sana-

tione apud Curiam Archiepiscopalem Sancti Germani a die XX mensis Maii

anno MMIII ad diem XX mensis Februarii anno MMIV Inquisitio dioecesana

celebrata est, omni sane adhibita diligentia et peritia. Cum autem cuncta

necessaria iureque requisita in huiusmodi rebus perfecta sint, eius Inquisitio-

nis auctoritas et vis iuridica a Congregatione de Causis Sanctorum Decreto

diei XVII mensis Februarii anno MMVI probatae sunt. Acta dein examini et

iudicio Dicasterii Medicorum Collegii subiecta sunt, quod in Sessione diei

XXVIII mensis Novembris anno MMXIII sanationem rapidam, completam et

duraturam, inexplicabilem secundum hodiernam scientiam medicam fuisse

affirmavit. Die XV mensis Maii anno MMXIV Congressus Peculiaris Consul-

torum Theologorum factus est, ac die XVI mensis Septembris eiusdem anni

Sessio Ordinaria Patrum Cardinalium et Episcoporum. Et in utroque coetu

sive Consultorum sive Cardinalium et Episcoporum, posito dubio an de

miraculo divinitus patrato constaret, responsum affirmativum prolatum est.

Exinde facultatem fecimus Congregationi de Causis Sanctorum ut hac de re

Decretum ederet atque decrevimus ut beatificationis ritus die XXVI mensis

Aprilis anno MMV in Archidioecesi Sancti Germani celebraretur.

Hodie igitur in urbe Rimouski de mandato Nostro Venerabilis Frater

Noster Angelus S.R.E. Cardinalis Amato, S.D.B., Praefectus Congregatio-

nis de Causis Sanctorum, textum Litterarum Apostolicarum legit, quibus

Nos Venerabilem Servam Dei Mariam Elisabetham Turgeon in Beatorum

numerum adscribimus: