1328 Acta Apostolicae Sedis - Commentarium Officiale

II

Venerabili Dei Servae Assumptae Marchetti caelitum Beatorum tribuitur dignitas.

FRANCISCUS PP.

Ad perpetuam rei memoriam. - « Esurivi enim, et dedistis mihi man-

ducare; sitivi, et dedistis mihi bibere; hospes eram, et collegistis me » ( Mt

25, 35).

Venerabilis Dei Serva Assumpta Marchetti suam in vitam haec Domini

verba intulit atque in pupillis pauperibusque Dominum adesse, subsidio

indigentem, agnovit.

Die XV mensis Augusti anno MDCCCLXXI in oppido Lombrici di Camaio-

re, intra Lucenses fines, tertia ex undecim liberis orta est. Adhuc puella

ad vitam consecratam, ut sororem Carmelitanam claustralem, se vocari

animadvertit, sed anno MDCCCXCIII mortuo patre, suum propositum differre

se debere intellexit, ut familiae necessitatibus subveniret. Anno MDCCCXCV

Iosephus frater, Congregationis Missionariorum a Sancto Carolo sacerdos,

qui, nova loca petentes, migrantes, in navibus spiritaliter curabat, cum de

Brasilia reverteretur, matri ac sorori proposuit ut se comitarentur orphano-

trophium curaturae, quod pro Italorum in itinere vel ob opera mortuorum

filiis conditurus erat. Illa invitatione perculsa, coram Sacri Cordis Iesu

imagine postquam oraverat et cogitaverat, Venerabilis Dei Serva intellexit

se non in monasterium invitari, sed missionariam fieri, atque studiosissime

Deo per fratrem vocanti assensa est.

Huic deliberationi se sociavit Carola mater et duae dominulae oppidi

Campignano di Camaiore, videlicet Maria Franceschini et Angela Larini.

Pater Iosephus antequam proficisceretur, una cum iis Placentiam petivit,

ad Episcopum beatum Ioannem Baptistam Scalabrini, qui eas benedixit,

animum addidit earumque vota suscepit sex post menses renovanda: id

factum est die XXV mensis Octobris anno MDCCCXCV. Novae hae religiosae

mulieres primum « Ancillae Pupillorum et Derelictorum ad Extera », ac

deinde Congregatio Sororum Missionariarum a S. Carolo Borromeo » sunt

cognominatae.