Congregatio de Causis Sanctorum 449

ROMANA seu FRIBURGENSIS HELVETIORUM

Beatificationis et Canonizationis Servi Dei Francisci Mariae a Cruce (in saec.:

Ioannis Baptistae Jordan), Sacerdotis et Fundatoris Societatis Divini Salvatoris

et Congregationis Sororum Divini Salvatoris (1848-1918)

DECRETUM SUPER VIRTUTIBUS

Servus Dei Franciscus Maria a Cruce Jordan die 16 mensis Iunii anno

1848, in vico Gurtweil prope Waldshut in Badenia (Germania) humili in

familia e parentibus Laurentio et Nothburga ortus est, trium fratrum

secundus. Sequenti iam die baptizatus nomen Ioannes Baptista accepit.

Decimo tertio circiter aetatis anno primam sanctam communionem recepit.

Inde in eo non solum gaudium recipiendi sanctam communionem et

sacramentum paenitentiae necnon orandi atque libros spirituales legendi,

verum etiam desiderium sacerdotii accrevit. Orbus patre, quindecim annos

natus, vim suam spiritualem ulterius roboravit. Curriculo scholae

elementariae absoluto, Ioannes Baptista operarii et pictorii officiis functus

est. Postquam vero talia opera etiam in aliis locis peregisset, tandem, viginti

fere aetatis agens, vocationem ad sacerdotium prosequi statuit. Privatas

lectiones accepit, deinde gymnasium urbis Konstanz frequentavit. Studiis

his completis, Friburgi Brisgavorum cursui theologiae et philologiae per

triennium se dicavit. Eodem insuper tempore studio variarum linguarum

modernarum incubuit. Data vero occasione Dei praesentiam in se speciali

modo percipiendi, conscius factus est doloris Ecclesiae Catholicae in Ger-

mania maxime ratione nascentis ideologiae quam vocant « Kulturkampf ».

Persuasum sibi habuit quod populi Europae in periculum apostasiae

incurrebant. Quapropter compulsum se sentiebat ad vitam omnino Deo

dicandam et per Deum tamquam instrumentum pro hominum salute.

Anno praeparationis ad sacros Ordines recipiendos in Seminario Sancti

Petri, in Silva Nigra, inspirationem quandam animadvertens quaesitavit

seipsum, utrumne illa vocatio ad fundandum motum apostolicum reapse a

Deo proveniret necne. Ardue disceptavit, ut voluntatem Dei cognosceret, et

maiore vigore ulterius ad sanctitatem aspiravit. Pariter ac praecedentibus

annis in urbe Friburgo et nunc quaedam obscuritatis solitudinisque interioris

momenta expertus est, verum etiam profundam iucunditatem in receptione

sanctae communionis.