Congregatio de Causis Sanctorum 453

BUFFALENSIS

Beatificationis et Canonizationis Servi Dei Nelsonii Baker, Sacerdoti dioecesani

(1841-1936)

DECRETUM SUPER VIRTUTIBUS

« Induite vos ergo sicut electi Dei, sancti et dilecti, viscera misericordiae,

benignitatem, humilitatem, mansuetudinem, longanimitatem [...]; super

omnia autem haec: caritatem, quod est vinculum perfectionis » (Col 3, 12. 14).

Paulina adhortatio ducit nos ad intellegendum spiritale iter Servi Dei

Nelsonii Baker, qui totum se dedit pastorali ministerio, constanter inserviit

a societate segregatis, quapropter a multis habitus est verus caritatis

apostolus.

Servus Dei die 16 mensis Februarii anno 1841 Buffali, in Statu Neo-

Eboracensi (in Foederatis Civitatibus Americae Septentrionalis), natus est.

Filius patris Ecclesiae Reformatae et matris catholicae, baptismum secun-

dum confessionem paternam accepit, sed, matris secutus exemplum, decem

annos natus catholicam amplecti decrevit religionem. Curriculis rite expletis,

opus exercere coepit in officina patris, quam statim ob participationem in

bello Secessionis Americanae relinquere debuit.

Acie relicta, commercialem industriam promovere incepit simul cum

amico, cui statim suum declaravit intimum desiderium quaerendi id quod

Deus pro eo vere voluerat. Illo enim tempore Nelsonius sacerdotem cognovit

Thomam Hines, « Domus Sancti Ioseph » moderatorem, qui, maxime pronus

ad puerulos parentibus orbatos curandos, suasit ei ut de vocatione quaerenda

cum Episcopo Buffalensi loqueretur. Hic enim benevole accepit eum quem

hortatus est ut seminarium ingrederetur. Servus Dei graviter consilium pon-

deravit et, postquam definitivam decisionem cum familia et amico socioque

communicavit, formativum iter arripuit ad sacerdotium apud Seminarium

loci v. d. Suspension Bridge.

His enim annis, praeterquam quod in curriculis explendis et variis spiri-

talibus inceptis diligenter eminuerat, longam in Europam suscepit peregrina-

tionem, in qua altam in animo maturavit devotionem erga Matrem Dei, sub

titulo Nostrae Dominae a Victoria invocatam et veneratam. Expletis deinde