Acta Apostolicae Sedis - Commentarium Officiale106

ipso pago Casapulla exercuit, quo in loco anno 1854, una cum aliis sacerdo-

tibus quibusdam, sodalicium, vel Confraternitatem condidit Beatae Virginis

Condolentis simul ad caritatem erga proximos fovendam et vulgus catechesi

erudiendum. Deinde vero in paroeciam sibi commissam Sancti Erasmi in

civitate S. Maria Capua Vetere se conferre iussus est. Adolescebat interea

homo spiritualis et, in dies magis velut lineis certis delineatus, in oratione

ardebat, tenera devotione Mariam Virginem diligebat, ex imo corde SS. Eu-

charistiam adorabat et contemplabatur, studium erga proximos caritatis

numquam intermittebat, perfectam denique christianae vitae staturam

consectabatur, in omnibus semper Dominum Crucifixum uti exemplar et

doctorem sibi proponens. Servus Dei a puero se disciplinae, studii, medita-

tionis ostenderat amantissimum. Quas virtutes, sacerdos factus, impensius

etiam coluit, illud sibi praestituens, ut similior in dies Christo fieret Sacerdoti,

magnanimis quoque hominibus adiutus, quorum in numero praeter Sanctum

Caietanum Erricum, quem superius vocavimus, Sancta Catharina Volpicelli,

Sancta Iulia Salzano, Beatus Bartholus Longo, Beata Rosa Gattorno fue-

runt. Quibus accedit, quod is patre spirituali Beato Ludovico de Casaurea

usus est. In virtutibus vero Servi Dei huius caritas adeo eminet fulgidissima,

ut ipsius in egenos liberalitas humilitati sine exemplo coniuncta velut in

proverbium exierit. In solacium autem animarum in Purgatorio expiantium

suffragia, amantissimo studio incitatus, offerre consuererat. Ille vero, cui

merito nomen inditum est viri « contemplativi in actione », cum animarum

salutis cupidissimo ardesceret desiderio, sicut singulari deditione numquam

destitit operibus a se conditis adesse, ita assidue reconciliationis sacramen-

tum administrare, contiones populo habere, fideles omnes hortari ut solis

bonis consiliis uterentur. Tandem confugientes optatissime excipere semper

cordi habuit.

Eo tamen temporum tractu, cum Italia sub unius regis imperio usque ad

annum 1861 cogeretur, hominum societas interea trepidationibus graviter

concutiebatur ac velut vulneribus videbatur discindi. Quamobrem, Servus

Dei, qui Italiae unius adsertoribus adversabatur, maxime ob ipsorum

in Ecclesiam odium quodammodo manifestum, biennio in carcere custodiri

passus est (1864-1866). Adversis tamen rebus, cruciatus orationis spiritum et

apostolatum Donati cum extenuare non potuissent, magis etiam acuerunt

et in ipso carcere detrusus fructus edidit eximios, siquidem illic Beatum

Ludovicum de Casaurea cognovit, quem semper habuit christianae caritatis

exemplar.