Congregatio de Causis Sanctorum 109

SANCTI PAULI IN BRASILIA

Beatificationis et Canonizationis Servae Dei Assumptae Marchetti, Confundatricis

Congregationis Sororum Missionariarum a Sancto Carolo (1871-1948)

DECRETUM SUPER VIRTUTIBUS

« In operibus suis Deus instrumentis ineptissimis, invalidissimis utitur.

Omnem fiduciam meam summa in eius Cordis suavitate collocavi ».

Verba haec, quae ex prima epistula Servae Dei Assumptae Marchetti

nuper Superiorissae Generalis electae ad Sorores Missionarias a Sancto

Carolo trahuntur, testimonium vitae mulieris cuiusdam austerae simul et

mitis, humana aequitate atque humilitate praesertim et caritate suffultae,

perstringunt.

Haec Serva Dei in vico Lombricio ad Campum Maiorem prope Lucam die

15 mensis Augusti anno 1871 e modesta familia nata est, tertia ex undecim

filiis. Postridie ortus, ad baptismalem fontem ecclesiae collegiatae Campi

Maioris ducta est. Iam inde a pueritia vividi ingenii dote praeditam se

ostendit, sed cum matri esset ipsi suppeditandum, modo parumper scholam

frequentare potuit. Vicesimum circiter aetatis agens annum, desiderium sese

consecrandi apud clausurae monasterium pandit, quod vero graves ob

familiae suae aerumnas aliquod tempus distulit.

Illis annis frater eius, missionarius Scalabrinianus, Pater scilicet Iosephus,

nunc Servus Dei, ut in Brasiliam peteret, eidem proposuit, Sororum necessi-

tudinis causa, quae orphanis ab ipso e viis recollectis providerent. Una cum

matre, itaque, quae interdum viro amisso viduata erat, Assumpta ad Novum

Mundum illum transiit. Etenim, in capella Episcopii Placentini die 25 mensis

Octobris anno 1895 mulieres ambae, cum aliis duabus sociis, vota religiosa

coram Episcopo loci, beato Ioanne Baptista Scalabrini, emiserunt et biduo

post Ianua ad oram Brasiliae navi evectae sunt.

Primis annis vitae Paulopoli Serva Dei, licet proprio titulo careret, revera

muneribus Superiorissae functa est, innumera suscipiens officia, quae post

praematuram mortem fratris et reditum matris in Italia protinus auxerunt.

Mense Septembris anno 1900, tamen, adventus sex Sororum Apostolarum a

Sacro Corde apud asylum pro orphanis curandis ingentem attulit novitatis

fervorem parvula in illa Ancillarum Orphanorum et Derelictorum Peregri-