Congregatio de Causis Sanctorum 1439

HIEROSOLYMITANAE LATINORUM

Canonizationis Beatae Mariae a Iesu Crucifixo (in saeculo: Mariae Baouardy)

Monialis Professae ex Ordine Carmelitarum Discalceatorum (1846-1878)

DECRETUM SUPER MIRACULO

Beata Maria a Iesu Crucifixo (in saeculo: Maria Baouardy) die 5 mensis

Ianuarii anno 1846 Nazareth in Terra Sancta e christifidelibus parentibus

ritus graeci-catholici, opibus egenis, locupletibus autem fide orta est, quorum

utroque orbata patruo commissa est postea Alexandriam in Aegypto com-

migrato, qui vero eam vix tredecim annos natam aegyptio cuidam sponsam

pollicitus est et, cum prorsus pridie matrimonii puellam crines detondisse

animadvertit, ira in eandem ferociter exarsit. Maria, igitur, cum operario

patrui interdum confisa est, sed eo suadente, ut fidem abiuraret, tantum

instinctum exserte recusavit, quapropter eiusdem furiam incendit, qui vul-

nus acinacis ad gulam in eam intulit corpusque puellae paene demortuae

super viam proiecit. His omnibus tempestatibus tamen Maria mire viguit et,

ex vico abscessa, Alexandriae, Hierosolymae et Beriti varias apud familias

ministravit, quarum ultimam Massiliam anno 1863 migratam secuta est. Post

tempus apud Sorores Sancti Ioseph ab Apparitione consumptum, a quibus

valetudinis causa discessit, anno 1867 monasterium Carmelitarum Pali in

Gallia uti chorista ingressa est, sed cum legere nesciret, inter conversas

transiit. Anno 1870, Mangalorem missa est, ubi prima fuit ex Carmelitis,

quae in India vota religiosa perpetua professae sunt. Anno 1875, una cum

sociis Sororibus destinata est monasterio Bethleem fundando, ubi die 26

mensis Augusti anno 1878 sanctitatis fama sive apud christianos sive apud

mahometanos circumfusa pie in Domino quievit. Summus Pontifex Sanc-

tus Ioannes Paulus II die 27 mensis Septembris anno 1981 eam virtutes

theologales, cardinales iisque adnexas in modum heroum coluisse decrevit

et die 13 mensis Novembris anno 1983 seu Anno Sancto Redemptionis in

numerum Beatorum rettulit.

Canonizationis respectu, Causae Postulatio iudicio huius Congregationis

de Causis Sanctorum assertam subiecit miram sanationem Beatae Mariae a

Iesu Crucifixo intercessioni tributam infantuli recens nati auxilio sectionis

caesareae, uti dicitur, succisionis editi sanationem, quae apud valetudinarium