80. (2. ) De Operibus VI dierum et de VI aetatibus.

1. Primo Deus caeli globum Molemque terrae condidit, Terram sed umbris abditam Abyssus alta texerat.

At per dies aetatibus Labentis aevi congruos Ornavit orbem et aethera Cunctamque mundi machinam.

8. Prima creator saeculi Die tenebras effugans Aquis adhuc absconditum Lampavit orbem lumine.

4. Lucis beata gaudiis Mundi replevit incolas Aetate mox altissimus Prima creator saeculi.

5. Locatur inter caerula Die secunda maximus Poli globus, divisaque est Utrimque lympha labilis.

6. Primo secundae tempore Aetatis arca mystica Hinc inde concurrentia Locatur inter caerula.

7. Lucente saecli tertia Die fluens sub aethere Abyssus alta subsidet, Virensque paret arida.

8. Electra proles Abrahae De perfidorum fluctibus Aetate florens claruit Lucente saecli tertia.

9. Quarta iubar sublimium Die emicabat siderum, Solo poloque fulgidam Lucis daturum gratiam.

10. Hebraea gens Davidico Regno refulsit inclita Aetate pandens actuum Quarta iubar sublimium.

11. Novum genus progignitur Quinta die de limpidis Nascens aquis natantium Volantiumque sub polo.

12. Aetate quinta in Chaldea Poenam luente Iudea Fidelium de perfidis Novum genus progignitur.

13. Sexta creatus est homo Die, creatoris sui Imaginem qui praeferens Semper beatus viveret.

14. Summus creator omnium, Per quem creatus est homo, Aetate filius Dei Sexta creatus est homo.

15. Obdormiente splendida Plasmatur Adae femina, Os illius ex ossibus, De carne carnem obtinens.

16. De carne Christo propria Et sanguinis mysterio Iam sponsa nata est in cruce Obdormiente splendida.

17. Post facta celsa conditor Die quiescens septima Eam vocari in saecula Et esse iussit sabbatum.

18. Aetas quietis septima Bene defunctos excipit, Qua sabbatizat cum suis Post facta celsa conditor.

19. Octava restat ceteris Aetatibus sublimior, Cum mortui de pristino Terrae resurgent aggere.

20. Vultumque Christi perpetim Iusti cernent amabilem Eruntque sicut angeli Caelesti in arce fulgidi.

21. Hanc ad se vitae semitam Ostendit ipse praevius De matre natus virgine Deus Deique filius.

22. Nam morte mortem destruens Sexta subegit sabbati, Quievit et in sabbato In corde terrae conditus.

23. Vitaeque prima sabbati Surgendo pandit ianuam Suisque congaudentibus Ascendit ad thronum patris.

24. Et sex in huius saeculi Aetatibus nos praecipit Nostram ferendo iam crucem Ius omne leti vincere.

25. Intrabimus post omnia Devicta mundi praelia Carnis soluti vinculis Vitae perennis sabbatum.

26. Sequetur una sabbati Claudenda nullo termino, Cum carnis immortalitas Aeterna nobis redditur.

27. Sic carnis atque spiritus Bino potiti gaudio Scandemus ad caelestia Regni perennis moenia.

28. Quo nos venire, quaesumus, Concede, sancta trinitas, linumque te cognoscere Verum Deum per saecula.

29. Hic igitur sperantibus Nobis atque orantibus In spiritu paraclito Sit plena consolatio.

30. Sint corda clara et fortia, Sit caro frugalissima, In modum solis fervidus Nunquam tepescat animus.

31. Alas virtutum geminas Biformis donans caritas Creatori consimilem Suam reddat imaginem.

32. Ut sabbatismi requie Nostrae fruantur animae, Donec surgente corpore Sit stolae decus geminae.

33. Praesta, pater piissime Patrique compar unice, Cum spiritu paraclito Nunc et per saecula.