90. (12. ) In Natali sancti Andreae.

Hymnus alter.

1. Salve, tropaeum gloriae, Salve, sacrum victoriae Signum, Deus quo perditum Mundum redemit mortuus !

2. 0 gloriosa fulgidis Crux emicas virtutibus, Quam Christus ipse proprii Membris dicavit corporis.

3. Quondam genus mortalium Metu premebas pallido, At nunc reples fidelium Amore laeto pectora.

4. En, ludus est credentium Tuis frui complexibus, Quae tanta gignis gaudia Pandis polique ianuas.

5. Quae conditoris suavia Post membra nobis suavior Es melle facta et omnibus Praelata mundi honoribus.

6. Te nunc adire gratulor., Te caritatis brachiis Complector, ad caelestia Conscendo per te gaudia.

7. Sic tu libens me suscipe Illius alma servulum, Qui me redemit per tuam Magister altus gloriam.

8. Sic fatur Andreas crucis Erecta cernens cornua Tradensque vestem militi Levatur in vitae arborem.

9. Nec cessat altus de cruce Docere turbam astantium, Vitam perennem cum Deo Polique regnum pandere.

10. Quorum fide iam fervida Turbaeque iudex territus Se pollicetur nexibus Hunc mortis atrae solvere.

11. At Andreas, caeli vias Regemque caeli ac dulcium Frequenti iam concivium Caelesti in arce contuens:

12. Iesu, precor, dixit, bone Magister, ista de cruce Me nemo vivum in corpore Vinclis solutis auferat,

13. Prius meum quam spiritum E carne raptum assumpseris In patriaeque moenibus, Cui milito, locaveris.

14. Haec dixit, et caelestibus Emissa lux e sedibus Circumdedit fortissimum Christi corusca martyrem.

15. Splendorque sole clarior Coram manendo plurimum, Quae palma vel quae gloria Crucem sequatur, edocet.

16. Quin ad poli mox edita Reversus alti spiritum Secum refert apostoli Nodis solutum corporis.

17. Qua cum tuis fidelibus Iesu triumphi carmina Victor beatus saeculi Gaudens in aevum personat.

18. Qua nobis inter agmina Sublimium felicia Da, Christe, sortem parvulis Hymnos tibi canentibus.