88. (10. ) In Natali sanctae Dei Genetricis.

1. Adesto, Christe, vocibus, Inesto nostris mentibus, Tua benignus dextera Choros canentum protege.

2. Qui natus es de virgine Nostrae salutis gratia, Da pura nobis pectora, Da membra casta corporis.

3. Et tu, beata prae omnibus Virgo Maria feminis, Dei genetrix inclita, Nostris faveto laudibus.

4. Pudica cuius viscera, Sancto dicata spiritu, Davidis ortum semine Regem ferebant saeculi.

5. Beata cuius ubera Summo repleta munere Terris alebant unicam Terrae polique gloriam.

6. Festiva legis quae sacris Ad alta templi limina Caelestis aulae principem Ulnis tulisti dulcibus.

7. Cuius sinu iam parvulum Magi videntes conditum Regem Deumque maximum Votis precantur redditis.

8. Christum ferens Memphitici Quae sacra vertens numinis, Deumque cernunt exteri, Fugant sui quem patria.

9. Quae maesta mundi gaudium Cum patre Ioseph quaeritas Summique patris aedibus Ovans sedentem repperis.

10. Cuius rogatu mysticas Christus sedens ad nuptias Aquas in alma transtulit Vini rubentis pocula.

11. Cuius pium pertransiit Ensis doloris spiritum, Natum tuo de corpore Deum mori cum cerneres.

12. Quam filio tonitrui

Crucis tonans de vertice Commendat auctor aetheris, Ut virgo servet virginem.

13. Nati Deique iam tui Quae cernis almo lumine Post dira mortis vincula Resuscitati gloriam.

14. Lucem poli quae conspicis Adire patris dexteram, Quam prima patris de sinu Terras adire videras.

15. Sublimis inter splendida Apostolorum sidera Flamma sacrique spiritus Impleta laudes concinis.

16. Laudem, Deo quam supplices Christo canentes reddimus, Christi genetrix, et tua Commendet intercessio.

17. Hymnos sacrae quos virgini Matrique castae dicimus, Emmanuel, tu suscipe Tuamque plebem libera.