83. (5. ) In Die Sancto Pentecostes.

1. Emitte, Christe, spiritus Donum tui paracliti, Quo nos replente munera Rite canamus ipsius.

2. Elegit hanc qui primitus Sacratiorem ceteris Diem, dicaret qua suo Ecclesiam charismate.

3. Cuius semel mirabilis Nos edocet descensio, Pios sacra perenniter Ut lampet omnes gratia.

4. Erantque in uno cum suis Apostoli consortibus Solario sublimibus Dei vacantes laudibus,

5. Cum missus alto spiritus Advenit a throno patris Seseque collaudantium Iplevit almus pectora.

6. Venit sono suavissima Venitque ferventissima In visione flammea Lucens ab alto gratia.

7. Quae nos solet scientiae Lustrare flamma ac lampade Dilectionis intimae Ignire nostra pectora.

8. Linguis in altus igneis Linguae creator spiritus Apparuit credentibus Verbique donum contulit.

9. Linguam simul doctoribus Laremque sacrum praebuit, Quos se loqui verbis docet Seseque amare in cordibus.

10. Linguas habent qui flammeas Cum caritatis spiritu, Ardore mentem proximi Christum sonando suggerunt.

11. Maiore qui miraculo Quorum replevit pectora, His omnium mox contulit Late loquelam gentium,

12. Cunctis per orbem ut gentibus Lingua canentes propria, Iesu, tuam potentiam Laudesque dicerent tuas.

13. 0 pulchra rerum gratia, Cum dissonas et moribus Et voce plebes antea Nectebat unus spiritus !

14. 0 sancta vere civitas Et vera pacis visio, Cum lux fidei plurimos Iam cor in unum cogeret!

15. Haec Iudeam beatitas Primo replevit munere, Haec usque mundi terminos Terris refulget omnibus,

16. Unamque Christi gloriam Linguae sonis distantibus Par mentium devotio Collaudat uno in spiritu.