86. (8. ) In Natali ss. Petri et Pauli.

1. Apostolorum gloriam Hymnis canamus debitis, Votis vacemus annuis, Iesu, fave precantibus.

2. Bariona Simon Petrus Et doctor almus gentium Festiva saeclis gaudia Suo dicarunt sanguine.

3. Coniunxit hora transitus Poli petentes ianuam, Quos una semper caritas Mundo retentos iunxerat.

4. Diversitates gentium Errore longo dissonas Ad veritatis gratiam Verbis trahebant consonis.

5. Ecclesiae princeps sacer In monte Iesum conspicit Vocemque patris igneo Audit poli de vertice.

6. Fulgentis ascendens poli Tertia Paulus edita Arcana discit, alteri Proferre nulli quae licet.

7. Gressus Cephae per caerula Christi iuvantur dextera; Christus suos, ne saeculi Demergat aequor, erigit.

8. Huius pericla saeculi Vinci fide credentium Paulus docet iam naufragos Salvans ab undis socios.

9. Imis Simon e fluctibus Mundi fideles extrahens Pisces bonos, ut liberet, Ad lucis effert patriam.

10. Kastris in huius saeculi Manere iustos incolas Paulus docet, tentoria Texendo castris congrua.

11. Languore fessos transiens Simonis umbra sublevat, Mundat leprae contagium Claudosque gressu roborat.

12. Magister altus gentium Atri furores spiritus Cunctumque morbum per sua Fugat potens sudaria.

13. Nox claudit ambos carcere Pleno sed aethrae lumine Umbras rident et vincula, Christi vident qui gloriam.

14. Oppessa leto corpora Ad lucis auras suscitant Hostesque iusti perfidos Abdunt tenebris inferi.

15. Praefulgido stolas suas Agni cruore laverant, Gustando mortis poculum Mortis triumphant principem.

16. Quantum sequi desideret Christi Petrus vestigia, Ad quem venire non timet Scalam crucis per asperam !

17. Regni perennis introit Paulus per ensem regiam, Nam qui Deum habet caput, Ferro libenter dat suum.

18. Sic principes ecclesiae, Sic vera mundi lumina Mortis triumpho nobili Sumpsere palmam gloriae.

19. Tropaea quorum insignia Iam Roma felix continet, Quorum coronas totius Orbis celebrat ambitus.

20. Vox ergo nostra te Deum, Te corda nostra personent, Teque in tuis mirabilem Collaudet omne saeculum.

21. Xriste, precamur, ut quibus Laudes ovantes dicimus, Horum frui nos lucidis Dones per aevum aspectibus.

22. Ymnis per aethram ac suavibus Apostolorum laudibus Noster chorus hic consonet Psalmis canorus dulcibus.

23. Zona benignus aurea Nos cinge castimoniae, Ut te videntes laudibus Tuis vacemus perpetes.