85. (7. ) In Nativitate s. Iohannis Bapt.

1. Praecursor alti luminis Et praeco verbi nascitur; Laetare, cor fidelium, Lucemque gaudens accipe !

2. Miranda cuius saeculis Nativitas per angelum Innotuit parentibus Pia fide iam praeditis.

3. Sublime cui vocabulum Iohannes ipse Gabriel Imponit et clarissima Ipsius acta praecinit.

4. Qui matris adhuc parvulus Vulva retentus spiritum Percepit almus gratiae, Testis futurus gratiae,

5. Necdumque natus iam dedit De luce testimonium, Quod natus admirabili Complevit ipse in gloria.

6. Hic plurimos ex Israel Christi fidei subdidit Et corda patrum in filios Docens superna transtulit.

7. In Heliae qui spiritu Venit prophetae semitam Parare Christo ac plebibus Iter salutis pandere.

8. Quo feminarum in filiis Propheta maior nullus est, Quin ipse miris actibus Plus quam propheta claruit.

9. Baptisma paenitentiae Qui praedicabat ac dedit Turbasque Iesu gratiae Illuminandas obtulit.

10. Ipsumque Iesum, qui omnia Sancto lavans in spiritu Emundat, in Iordanici Tinxit fluento gurgitis.

11. Et baptizato protinus Aperta vidit aethera Nobis suo baptismate Pandit polique regiam.

12. Atque in columba spiritum Illum super descendere Vidit, doli qui nescius Mentes requirit simplices.

13. Audivit et vocem patris: Dilectus hic est filius A saeculo, dixit, meus, In quo mihi complacui.

14. Edoctus his oraculis

Baptista Iesum praedicat Natum Dei, qui in spiritu Sancto fideles abluat.

15. Quid sermo noster amplius Huius canat praeconia? De quo patris vox filio Olim locuta praecinit:

16. En, mitto, dixit, angelum, Tuam paret qui semitam Vultumque praecurrat tuum Solem rubens ut lucifer.