CAPUT I.

In nomine Domini, amen. Incipit regula et forma vitae ordinis sororum pauperum, quae quidem est sanctum evangelium Domini nostri Jesu Christi observare vivendo in obedientia, sine proprio et in castitate. Clara indigna ancilla

Christi promittit obedientiam et reverentiam domino papae Innocentio ac successoribus ejus canonice intrantibus et ecclesiae Romanae. Et sicut in principio conversionis suae una cum sororibus suis promisit obedientiam fratri Francisco, ita eandem promittit inviolabiliter observare successoribus suis. Et aliae sorores teneantur semper successoribus fratris Francisci et sorori Clarae et aliis abbatissis canonice electis ei succedentibus obedire.