CAPUT IV.

De electione abbatissae.

In electione abbatissae teneantur formam canonicam observare. Procurent ipsae habere generalem ministrum vel provincialem ordinis fratrum minorum, qui verbo Dei eas informet ad omnimodum concordiam, communem utilitatem in electione facienda, et nulla eligatur nisi professa. Et si non professa eligeretur vel aliter daretur, ei non obediant, nisi primo profiteatur formam hujus paupertatis. Qua decedente electio alterius fiat abbatissae. Et si aliquo tempore appareret universitati sororum, praedictam non esse sufficientem ad servitium et communem utilitatem ipsarum, teneantur praedictae sorores juxta formam praedictam, quam citius poterunt, aliam sibi in abbatissam et matrem eligere. Electa vero cogitet, quale onus in se susceperit et cui redditura est rationem de grege sibi commisso. Studeat etiam aliis magis praeesse virtutibus et sanctis moribus, quam ex officio, ut ejus exemplo provocatae sorores potius ex amore obediant, quam timore. De privatis amoribus caveat, ne, dum in parte plus diligit, in toto scandalum generet. Consoletur afflictas. Sit etiam ultimum refugium tribulatis, ne, si apud eam remedia defuerint sanitatum, desperationis morbus praevaleat in infirmis. Communitatem servet in omnibus, praecipue autem in ecclesia, dormitorio, refectorio, infirmaria et vestimentis. Quod simili modo servare ejus vicaria teneatur. Semel in hebdomada ad minus abbatissa sorores suas teneatur ad capitulum convocare, ubi tam ipsa, quam sorores de omnibus et publicis offensis et negligentiis debeant humiliter confiteri. Et quae tractanda sunt pro utilitate et honestate monasterii, ibidem conferat cum omnibus sororibus. Saepe enim Dominus, quod melius est, minori revelat. Nullum debitum grave fiat, nisi de communi consensu sororum et manifesta necessitate, et hoc per procuratorem. Caveat autem abbatissa cum sororibus suis, ne depositum aliquod recipiat in monasterio, saepe enim de his turbationes et scandala oriuntur. Ad conservandam autem unitatem mutuae dilectionis et pacis de communi consensu omnium sororum omnes officiales monasterii eligantur. Et eodem modo octo ad minus sorores de discretioribus eligantur, quarum in his, quae forma vitae sororum requirit, abbatissa semper uti consilio teneatur. Possint etiam sorores et debeant, si eis utile et expediens videatur, officiales et discretas aliquando removere et alias loco ipsarum eligere.