136. (5. ) Hymnus de Natali Domini.

R. Christo nato, rege magno, totus orbis gaudeat.

1. Lumen clarum rite fulget orto magno sidere, Quod per totum splendet orbem umbras noctis aufugans.

2. Dux de Iuda, quem propheta olim iam praedixerat, Laetus nobis, ecce, venit Bethlem nascens inclita.

3. Hunc regalis virgo mater partu gaudens edidit, Quem Gabriel nuntiavit salvatorem gentium.

4. Cum pastores excubantes, cura mordet nam gregis, Clarus ipsos ad laetandum exhortatur nuntius.

5. Concinebat angelorum turba laeta laudibus, Terrae pacem praedicantes caelo reddunt gloriam.

6. 0 stupendum mirandumque sacramentum gloriae, Quod tonantem supra cuncta virgo gestat parvula !

7. Factor caeli, terrae factor vulva est clausus feminae, Auctor summus angelorum fit praesaepe conditus.

8. Palmo caelum qui metitur, terram claudit pugili, Pannis paucis obvolutus infans vagit parvulus.

9. Quae divisit lucem ab umbris summi primum dextera, Matris mammas, ecce, tractat lactis potum quaesitans.

10. Os praeclarum conditoris, quod formavit saeculum, En, admotum nunc libenter sugit matris ubera.

11. 0 beata mater Christi, David stirpis femina, Tu laus orbis et regina, laeta virgo Maria.

12. Votis assis tu piorum

omne servans saeculum, Patriarchis et prophetis laus, corona gloriae.

13. Ecce, sperant laetabunda angelorum agmina, Christi plebem quod gubernes arcanorum conscia.

14. Nam te, virgo, caelebs, nupta, sexus omnis adpetit, Tu parentes atque natos deprecando protege.

15. Gaudet caelum cum supernis angelorum milibus, Omnis terrae plenitudo, pontus, astra, flumina.