150. (19. ) In Natale sancti Andreae Apostoli.

1. Nobis, ecce, dies ordine congruo Venit nunc celebris, clarus, amabilis, Quo victor super alta Scandit propere sidera

2. Andreas, Domini sanctus apostolus Germanusque Petri, principis incliti, Princeps ipse virilis Consors martyrio fuit.

3. Dum Christum comites gressibus et pares Exaequant pariter, dogmata colligunt, Eius morte sequuntur Et vestigia per crucem.

4. Piscator fuerat Petrus et Andreas, Post ambo rapiunt orbis et agmina, Vastant aequora mundi

Ad regna atque trahunt poli.

5. Laudem rite crucis fortiter expetunt, Dum Christi crepitant de cruce gloriam, Caeli regna capescunt, Vitam de cruce colligunt.

6. Andreas utique conspiciens crucem Exclamat subito taliter intonans: Salve, sancte triumphus, Christi perpetuus honor.

7. Me nunc tu famulum suscipe cernuum, Quae dudum Dominum extuleras pium, Tu nunc redde magistro, Quae me exquisieras Deo.

8. Huius nos precibus, Christe, piissimis Absolve, petimus, ipse reatibus, Luci trade redemptos, Purgans sanguine noxios.

9. Da mentem sobriam sic regis advenam, Da stamen operis de fece corporis, Intus, foris, ubique

Tu nos, inclite, protege.

10. Praesta hoc, genitor optime maxime, Hoc tu, nate Dei, et bone spiritus, Regnans solus in arce Per cuncta pie saecula.