1. En, caeli rutilant lumina splendida, Testantur Dominum nascere parvulum, Qui format minima et qui creat ardua, Regni sceptra tenens est Deus atque homo.

2. Duxit stella magos mystica quaerere Regis pacifici rite cunabula, Quem Iudaea tenens orbis in ultima Diffusis radiis nuntiat inclita.

3. Herodes capiens impius auribus,

Quod rex hic fuerat natus, in urbibus Iudaeae hunc citius quaerere praecipit Tristis moxque neci tradere destinat.

4. Inventus Dominus indice sidere est In Bethlem pariter cumque parentibus, Cui mox ergo magi munera deferunt, Tus, murram, aurum ab Ophir regi, homini, Deo.

5. Huic, trux ipse licet saeviat horride Herodes, iubeat caedere parvulos, Regnum rite suum firmiter undique Servatur Domino; corruit invidus.

6. En, est ista dies munere nobilis,

Baptismo haec Domini, nobilis exstitit, Quod vinum Dominus fecerat ex aqua, Commendat placide haec sacra dogmata.

7. Gaudemus pariter mentibus, en, precor, Quod nobis Dominus hic pius advenit, Quod nostra voluit munera sumere, Quod baptisma dedit, pocula contulit.

8. Nam rex Christus adest orbis et arbiter, Lux de luce pia et pater omnium, Qui nos ad patriam ducat et optimam Et vitae faciat gaudia metere.