148. (17. ) In Natale Apostolorum Petri et Pauli.

1. Sanctorum pariter promite principum Natalem, socii, psallite laudibus Insignemque triumphum Gaudentes sonitu date.

2. Hoc poscit utique inclita gloria Tantorum comitum regis et optimi, Cum quo lucis in arce Laeti perpetuo manent.

3. Nam Petrus titulum erigit arduum, Cum pro laude Dei claviger aetheris Exsultat generosus

Caeli regna potens tenens.

4. Cuius perpetuus exstat et inclitus

Paulus nam socius, doctor et optimus, Christi vas pretiosum Et rector populi Dei.

5. En, quos iste vocat, ille supra locat, Quos Paulus adhibet, hos Petrus inserit; Christi testis uterque est, Caeli civis et incola.

6. Christum morte crucis nam sequitur Petrus, Cum caesus capite Paulus et horride est, Victores caput unum

Ambo rite tenent Deum.

7. Nos horum precibus, Christe, piissimis Te dones citius poscere caelitus, Absit quod scelus omne Et cuncta veniant bene.

8. Immunes manibus simus et actibus, Sensum corde pium confer et optimum, Ut te rite colentes

Cernamus Dominum greges.

9. Cuius orbis honor, cuius et aethera, Cuius vita salus et bona maxima, Est cui nomen in aevum, Regnum perpetuum simul.

10. Sit patri ingenito gloria maxima. Sit nato pariter consona gloria Cum flatu simul almo Per cuncta pie saecula.