141. (10. ) Hymnus dicendus in Pascha Domini.

R . Surrexit quia Christus a sepulcro, Collaetetur homo choro angelorum.

1. Cantemus Domino Deoque nostro, Fratres unanines, probas verenter Laudes ex animo pio canentes, Nunc paschalia festa cum tenemus.

2. Agnus nempe sacer patres de Aegypto Olim eduxerat edito cruore, Et nunc sanguine Christus e tenebris Infernalibus ipse nos redemit.

3. Qui sicut populum tulit priorem

Per rubrum mare hoste ibi interempto, Sic baptismate nosque liberavit Submerso zabulo unda passionis

4. Nam Iudaea fremens necem paravit Christo inferre crucis dolo magistro, Quam sedare nequit pia medela Nec verbi studium boni parentis.

5. Prendunt arte nova prodente alumno Doctorem manibus, trahunt ligando, Tradunt pontifici dein tyranno, Insontem ut cruciet pium ac flagellet.

6. Post quae dant alapas, vomunt salivam In sacram faciem et caput coronant Spinis, in cruce hunc repente figunt, Potum fel dederant, latus terebant.

7. Emittens animam chaos penetrat,

Christus mortis ovans fugans tenebras, Iustos eripuit, ligavit hostem, Donans astra piis, dolorem iniquis.

8. Surgit diluculo a sopore mortis Salvator placide angelo ministro, Custodes pavitant, pii resultant, Gaudent discipuli, invidi dolebant.

9. Cognovit Maria ex sono magistrum, Thomas perque latus Deum reclamat, Flagrans rite Petrus adit sepulcrum, In monte Dominum undecimque adorant.

10. Quid, Iudaea, furis Deo reluctans, Fingens arte scelus dolo reperto, Furatum crepitans, qui ovat coruscans, Qui mundum reparat, Satan trucidat?

11. Laudant astra, poli, mare solumque Gaudentes Dominum videre Christum, Tristis sola doles iniqua fingens Consors daemonum, particeps gehennae.