Dicit igitur : " Vae vobis , Scribae et Pharisaei hypocritae. " Sophon. II, 5 :

Vae qui habitatis funiculum maris, gens perditorum !

" Qui, " per sanctitatis jactatum amorem, " aedificatis, " solemnibus saxis, " sepulcra Prophetarum, " in quibus fuit excellens divinae voluntatis revelatio. Psal. lxxxviii, 20 : Tunc loculus es in visione sanctis tuis. Osee, XII, 10 : Ego visionem multiplicavi, et in manu Prophetarum assimilatus sum.

" Et ornatis, " decoris picturis et coloribus, " monumenta :" dicta quasi monimenta, eo quod tituli ponebantur in talibus bustis et tumulis, " justorum, " in quibus fuit excellens divina bonitas.

" Et dicitis. "

Ecce jactantia sermonis. " Si fuissemus in diebus patrum nostrorum, " homicidarum, " non essemus socii eorum, " per consensum, " in sanguine " effuso " Prophetarum. " Psal. lxxviii, 3 : Effuderunt sanguinem servorum tuorum, tamquam aquam in circuitu Jerusalem, Act. VII, 52 : Quem Prophetarum non sunt persecuti patres vestri ? Et occiderunt eos qui praenuntiabant de adventu Justi, cujus vos nunc proditores et homicidae fuistis,

" Itaque testimonio estis vobismetipsis, quia filii estis eorum qui Prophetas occiderunt.

Et vos implete mensuram patrum vestrorum,

Serpentes, genimina viperarum, quomodo fugietis a judicio gehennae? "

Ecce confutatio per ostensionem vanae et planae falsitatis. Dicit autem duo : primo enim confutat : et secundo, confutationem per id quod anima de sua occisione conceperat, praedicit.

Dicit igitur : " Itaque, " ex quo illos confitcmini patres qui Prophetas occide- runt, " testimonio estis vobismetipsis, " hoc est, contra vometipsos : per hoc jam tractatis qualiter Dominum prophetarum occidatis, et discipulos ejus : " quia estis, " per imitationem, " filii eorum qui Prophetas occiderunt. " III Reg. XIX, 10 : Altaria tua detraxerunt, Prophetas tuos occiderunt gladio, derelictus sum ego solus, et quaerunt animam meam,

" Et vos implete, " hoc est, implebitis, sicut, Joan. ii, 19 : Solvite templum hoc, id est, solvetis. Et est praedictio futuri homicidii, per quod probantur filii homicidarum.

" Mensuram. " Hoc enim solum deest, quod non est plena, quia Dominus Prophetarum est occidendus : et tunc mensurae plenae respondebit destructionis et abjectionis paena. 1 ad Thessal. ii, 16 : Ut impleant peccata sua semper. Genes. xv, 16 : Necdum enim completa sunt iniquitates Amorrhaeorum .

" Patrum vestrorum. " Ezechiel. XVI, 3 et 4 : Pater tuus Amorrhaeus, et mater tua Cethaea. Et quando nata es, in die ortus tui, non est praecisus umbilicus tuus. Adhuc enim adhaeres ventri homicidarum. Isa. I, 4 : Vae genti peccatrici, populo gravi iniquitate, semini nequam, filiis sceleratis !

" Serpentes. "

Objurgatio est criminis. Serpentes autem sunt morsu linguae, quo crucifigunt

Christum. Eccle. x, 11 : Si mordeat serpens in silentio, nihil minus habet qui occulte detrahit. Serpens enim morsu peior est quam vipera: et ideo serpentes sunt in morsu Christi.

" Genimina viperarum : " venenati venenatorum filii in occisione Apostolorum, quam jam meditamini, sicut patres vestri prophetas occiderunt. Supra, III, 7 : Progenies viperarum, quis demonstravit vobis fugere a ventura ira ?

" Quomodo fugietis, " falso nomine jactatae justitiae, " a judicio gehennae ? " quod erit secundum cordis scru- tationem, et non secundum exteriorem jactantiam. Sophon. I, 12 : Scrutabor Jerusalem in lucernis. Apocal. xx, 12 : Libri aperti sunt : et alius Liber apertus est, qui est vitae : et judicati sunt mortui ex his quae scripta erant in libris.

" Ideo ecce ego mitto ad vos prophetas, et sapientes, et scribas.

Hic convincit jactantiam esse mendacem. Et tangit duo, scilicet quod occisores sunt Prophetarum, et ingrati maximis beneficiis Domini : et ideo exterminandi, ibi, v. 37 : " Jerusalem Jerusalem . "

In prima harum partium sunt tres paragraphi : in quorum primo continetur beneficium missionis Apostolorum : in secundo, maleficium occisionis : in tertio, justitia vindicationis. Et haec patent in littera.

Nota autem quod excellentia scientiae non est nisi tribus modis, scilicet in accipiendo, et in scito, et in generalitate sciendi. Excellentia autem in acceptione scientiae est in propheta : in scito autem excellentia est in sapiente : quia " sapiens " est qui scit ea quae difficile est homini " scire propter sciti altitudinem, " ut dicit Philosophus : et hic est, qui scit divina per experimentum divinorum. Excellentiam autem in generalitate sciendi est in Scriba, qui, sicut dixit Hieronymus, " est in tota lege doctissimus. " In primo horum, praedicatio fidei habet certitudinem : ex secundo, saporem : et ex tertio, probationem : et his tribus perficitur praedicator fidei.

Dicit igitur: " Ideo. " Quia dicitis vos non esse socios patrum homicidarum, " ideo, " ut ostendam vos esse mendaces, " ecce, " in proximo, " ego mitto ad vos. " Luc. x, 3 : Ite : ecce ego mitto vos sicut agnos inter lupos. Matth. x, 16 :

Ecce ego mitto vos sicut oves in medio luporum.a Prophetas " Act. XIII, 1 : Erant in Ecclesia quae erat Antiochiae, Prophetae, et Doctores. Joel, II, 28 : Prophetabunt filii vestri, et filiae vestrae . I ad Corinth. XIV, 29, 31 : Prophetae duo aut tres dicant, et caeteri dijudicent... Potestis enim omnes per singulos prophetare, ut omnes discant, et omnes exhortentur.''

" Sapientes, " qui de magnis et arduis dicant, sicut sunt caelestia. Proverb. VIII, 6, dicit sapientia : De rebus magnis locutura sum. I ad Corinth. ii, 6 et seq. : Sapientiam loquimur inter perfectos,sapientiam vero non hujus saeculi, neque principum hujus saeculi, qui destruuntur : sed loquimur Dei sapientiam in mysterio, quae abscondita est..., quam nemo principum hujus saeculi cognovit.

" Et Scribas, " in lege doctissimos, Spiritu sancto docente. Act. XXVI, 24, dixit Festus : Insanis, Paule : multae te litterae ad insaniam convertunt. Daniel. xii, 3 : Qui docti fuerint, fulgebunt quasi splendor firmamenti: et qui ad justitiam erudiunt multos, quasi stellae in perpetuas aeternitates.

" Et ex illis occidetis et crucifigetis, et ex eis flagellabitis in synagogis vestris, et persequemini de civitate in civitatem. "

Hic tangit istorum filiorum paternam imitationem. Et tangit duo genera paenarum, mortis scilicet et afflictionis.

Mortis autem duo genera, quorum unum simplicem dicit mortis mulctam : aliud autem supra inuictam mortis cumulum addit confusionis. Similiter afflictiones sunt captorum, et capiendorum : captorum quidem flagellatio, capiendorum persecutio. Et hoc est : " Et exiliis occidetis, " sicut duos Iacobos : unum procuraverunt occidi per Herodem. Act.

xii, 2 : Occidit autem Jacobum, fratrem Joannis, gladio. Alterum praecepit occidi Pontifex in templo perlica fullonis.

" Et crucifigetis, " confusionem addendo mortis horrori : ut Petram, et ipsum Dominum, et Andream: et multos alios. Ad Hebr. XII, 2 : Proposito sibi gaudio sustinuit crucem, confusione contempta.

" Et ex eis flagellabitis, " quae est mulcta sine morte. II ad Corinth. XI, 24 : A Judaeis quinquies, quadragenas, una minus accepi. Act. v, 41 : Ibant, scilicet Apostoli flagellati, gaudentes a conspectu concilii, quoniam digni habiti sunt pro nomine Jesu contumeliam pati.

" In synagogis vestris, " ubi major est confusio. Apocalyps. II, 9 : Blasphemans ab his qui se dicunt Judaeos esse, et non sunt, sed sunt synagoga Satanae,Et persequemini, " non captos, sed spoliatos, " de civitate in civitatem. " Supra, x, 23 : Cum persequentur vos in civitate ipsa,fugite in aliam.I ad Corinth, IV, 12 : Persecutionem patimur, et sustinemus,

" Ut veniat super vos omnis sanguis justus qui effusus est super terram, a sanguine Abel justi usque ad sanguinem Zachariae, filii Barachiae, quem occidistis inter templum et altare.

Amen dico vobis, venient haec omnia super generationem istam. "

" Ut veniat super vos. " Ut notat hic consecutionem, non causam : et tangit hic ex dictis cumulum damnationis eorum ex multo reatu sanguinis. Et dicit duo : reatus cumulum ex operibus eorum et quia futura haec adhuc sunt, ideo asserit ea pro certo ventura et complenda.

Dicit ergo : " Ut veniat, " per cumu- lum reatus. II Machab. VI, 15 : Ut peccatis nostris in finem devolutis, ita demum in nos vindicet.

" Super vos, " opprimendos sicut massa. Psal. xxxvii, 5 : Sicut onus grave gravatae sunt super me. Hoc est enim onus vallis visionis .

" Omnis sanguis, " hoc est, reatus sanguinis. II Machab. VIII, 3 et 4 : Et vocem sanguinis ad se clamantis audiret... : et indignaretur super his.

" Qui effusus est super terram. " Job, XVI, 19 : Terra, ne operias sanguinem meum, neque inveniat in te locum latendi clamor meus.

" A sanguine Abel justi, " quem occidit primus hujus generationis pater Cain . " Usque ad sanguinem Zachariae, filii Barachiae. " Zacharias fuit filius Joiadae sacerdotis, qui pro praerogativa justitiae suae Barachias, hoc est, benedictus Domini cognomento dicebatur. II Paralip. XXIV, 20 et 21 : Spiritus Dei induit Zachariam, filium Joiadae sacerdotem : et stetit in conspectu populi, et dixit eis : Haec dicit Dominus Deus : Quare transgredimini praeoeptum Domini, quod vobis non proderit, et dereliquistis Dominum ut derelinqueret vos ? Qui congregali adversus eum, miserunt lapides juxta regis imperium in atrio domus Domini.