Et hoc est, quod sequitur :

" Quem occidistis inter templum, " hoc est, templi frontem exteriorem, " ei altare " holocaustorum.

Et quia aliquis posset dicere, quod isti non fecerunt hoc : ideo subsequenter asserit omnes istos, et illos de una esse generatione dicens :

" Amen dico vobis, "

Quia in veritate talis vindicta sequetur, " venient haec omnia. " Licet non in tempore eorum facta sint, quia tamen per istos complentur malitiae praetenden- tium. Isa. III, 11 : Vae impio in malum ! retributio enim manuum ejus fiet ei.

" Super generationem istam " pessimam. Psal. lxxvii, 8 : Generatio prava et exasperans. Generatio quae non direxit cor suum, et non est creditus cum Deo spiritus ejus. Sicut enim generatio est rectorum, quae benedioetur,quae non est in uno tempore : ita etiam malorum.

" Jerusalem, Jerusalem, quae occidis prophetas, et lapidas eos qui ad te missi sunt, quoties volui congregare filios tuos, quemadmodum gallina congregat pullos suos sub alas, et noluisti ! "

Hic ostendit etiam ad malos suae dilectionis effectum et affectum, et illorum ingratitudinem et malitiam. Et dicit tria : primum est pertinax judaicas perversitatis malitia contra beneficum revocantem : secundum est ostensio suae dilectionis etiam nolenti : tertium est conclusio capituli de justa vindicta, quae procedet in eos. Et haec patent in littera.

De primo dicit : " Jerusalem, Jerusalem. " Geminatio notat compassionis affectum. Vel, quia dixerat de patribus viperis, et filiis serpentibus in malitia convenientibus, significans utrumque successione, per metonymiam nomen civitatis ingeminat, continens ponens pro contento. Luc. XIX, 41 et 42 : Videns Dominus civitatem Jerusalem, flevit super illam, dicens : Quia si cognovisses et tu.

" Quae occidis prophetas. " III Reg. XIX, 1, Jezabel occidit prophetas Domini : " et lapidas eos qui " ex magna charitate, " ad te missi sunt, " Supra, XXII, 6 : Tenuerunt servos ejus, ei con-tumeliis affectos occiderunt. Act, vii, 59 : Lapidabant Stephanum, ejectum scilicet extra civitatem. Ad Hebr. XI, 36 et 37 : Alii ludibria et verbera experti, insuper et vincula et carceres : lapidati sunt, secti sunt, tentati sunt, in occisione gladii mortui sunt.

" Quoties volui, " hoc est, quotiescumque volui. Et est ostensio dilectionis etiam nolentibus et reluctantibus.

" Congregare, " in unum cor, et unam animam, sicut erat multitudinis credentium . Psal. cxlvi, 2 : Dispersiones Israelis congregabit. Ezechiel. XI, 17 : Congregabo vos de populis, et adunabo de terris in quibus dispersi estis.

" Filios tuos, " quos ex semine meo, hoc est, ex verbo legis genuisti.

" Quemadmodum gallina congregat. " Gallina quae etiam non suos fovet et congregat et infirmatur ad pullos, ita ut vox acuatur, et sibi cibum subtrahens pullis ministrat, et periculis se pro pullis exponit, et eos ad vitalem suum calorem sub pennis congregat. De primo horum, Supra, XI, 28 : Venite ad me, omnes qui laboratis et onerati estis. De secundo, II ad Corinth. XI, 29 : Quis infirmatur, et ego non infirmor? De tertio, Joan. vi, 56 : Caro mea vere est cibus, et sanguis meus vere est potus. De quarto, Joan. XVIII, 8 et 9 : Si me quaeritis, sinite hos abire. Ut impleatur sermo quem dixit : Quia quos dedisti mihi, non perdidi ex eis quemquam. De quinto, Psal. cv, 47 : Congrega nos de nationibus, ut confiteamur nomini sancto suo, ei gloriemur in laude tua.

" Congregat pullos sub alas. " Psal. lvi, 2 : In umbra alarum tuarum sperabo, donec transeat iniquitas. Deuter. xxxii, 11 : Expandit alas suas, et assumpsit eum, atque portavit in humeris suis.

" Et noluisti, " hoc est, etiam quos congregavi, te nolente, et reluctante congregavi. Joan. v, 40 : Non vultis veniread me ut vitam habeatis : et ideo justa vos consequitur condemnatio. Et hoc est :

" Ecce relinquetur vobis domos vestra deserta.

Dico enim vobis, non me videbitis amodo, donec dicatis : Benedictus qui venit in nomine Domini. "

" Ecce relinquetur vobis, " non mihi de caetero, " domus, " scilicet templum, " vestra, " non mea, " deserta. " Jerem. XII, 7 et 8 : Reliqui domum meam, dimisi haereditatem meam.... Facta est mihi haereditas mea quasi leo in silva : dedit contra me vocem. Isa, I, 7 : Terra vestra deserta, civitates vestrae succensae igni : regionem vestram coram vobis alieni devorant, et desolabitur sicut in vastitate hostili. Jerem. li, 9 : Derelinquamus eam, et eamus unusquisque in terram suam. In ecclesiastica historia legitur, quod auditaeunt voces in templo dicentes : Transeamus ab his sedibus.

Probatio autem quod deserta erit, est quia

" Dico vobis, non me videbitis amodo, "

A tempore passionis, " donec dicatis, " in secundo adventu : " Benedictus " est, in quo non est nisi benedictio, " qui venit in nomine Domini, " in quo nihil nisi nomen et notitia Dei apparuit, quem Pater misit ad nomen suum clarificandum : et tunc tarde dicetis. Luc. XXI, 27 : Videbunt Filium hominis venientem in nube. Zachar. XII, 10 : Adspicient ad me quem confixerunt. Apocal. I, 7 : Ecce venit cum nubibus, et videbit eum omnis oculus, et qui eum pupugerunt. Isa. xxx, 27 : Ecce nomen Domini venit de longinquo : ardens furor ejus et gravis ad portandum. Haec est expositio Chrysostomi. Hieronymus autem exponit de ultima conversione Judaeorum, quando videntes se ab Antichristo esse deceptos, convertentur et confitebuntur Filium Dei esse Jesum, et benedictum qui venit in nomine Domini, prodens multis signorum experimentis notitiam Patris. Psal. lviii, 15 : Famen patientur ut canes: et circuibunt civitatem. Isa. x, 22 : Si fuerit populus tuus Israel quasi arena maris, reliquiae convertentur ex eo.

Sic igitur terminatae sunt interminationes maledictionum, etc.