Acta Apostolicae Sedis - Commentarium Officiale536

Canonizationis intuitu, Postulatio Causae examini huius Congregationis

de Causis Sanctorum coniectam praebuit miram Villelmi Glisson sanationem,

quae in urbe Springfield, intra fines Archidioecesis Philadelphiensis, evenit.

Horis postmeridianis diei 15 mensis Martii anno 2002, iuvenis Villelmus,

viginti et unum annos natus, dum cum amico velociter soleis ferratis sine

casside prolaberetur, causa foraminis in asphalto cecidit vulnus sibi inferens

gravissimum ad cranium occipitale. Statim curationem accepit; medici

arcerae adhuc conscium invenerunt eum, qui in valetudinarium altiore

technica instructum translatus est, quo in veternoso statu pervenit. Mater

in valetudinarium cucurrit, ubi medici certiorem fecerunt eam de gravitate

condicionum filii atque de exigua spe vitae ob gravissimum vulnus cranicum

eiusque consectaria.

Quattuor transactis diebus, amica familiae quae opus exercebat apud

quoddam institutum rehabilitationis, cura Operae don Guanella admi-

nistratum in pago Springfield, matri duas particulas reliquiarum beati

Aloisii tradidit. Domina firma fide unam admovit ad pulsum filii, dum

aliam ad suum tenuit collum atque ardenter orare coepit ut miraculum,

Beato intercedente, patraretur. Preces non solum inter parentes diffusae

erant, sed etiam in schola catholica quam soror infirmi frequentabat;

interea chirurgi frustra duas conati sunt agere operationes. Attamen die 25

mensis Martii quiddam mutatum est; medici enim primum apud infirmum

signa sanationis detexerunt, quae sequentibus diebus confirmata sunt. Die 9

mensis Aprilis Villelmus ex valetudinario dimissus est cum praescriptione

agendi rehabilitationem functionalem neuromotoriam, cuius gratia, intra

duos ab eventu menses, ita celerem obtinuit recuperationem ut cognitivum

et neuropsychicum nullum exhiberet defectum et inter neurochirurgos

stuporem provocaret. Octo post mensibus iuvenis opus exercere perrexit,

carpentarii videlicet in officina patris in qua, priusquam infortunium

subiret, iam operam praestabat.

Evidens est quod inde a tempore quo preces iniri sunt coeptae, beato

Guanella intercedente, valetudinis infirmi condicio mirum ac faventem in

modum convaluit.

De hoc casu, miro considerato, a die 16 mensis Septembris anno 2005

ad diem 18 mensis Decembris anno 2006 apud Curiam Philadelphiensem

Inquisitio dioecesana est instructa, cuius iuridica validitas ab hac Congrega-

tione de Causis Sanctorum per Decretum diei 20 mensis Aprilis anno 2007

approbata est. Consilium Medicorum Dicasterii in sessionibus die 28 mensis