Congregatio de Causis Sanctorum 535

ACTA CONGREGATIONUM

CONGREGATIO DE CAUSIS SANCTORUM

COMEN. seu MEDIOLANEN.

Canonizationis Beati Aloisii Guanella, Sacerdotis Fundatoris Congregationis

Servorum a Caritate et Instituti Filiarum a Sancta Maria Providentiae (1842-1915)

DECRETUM SUPER MIRACULO

Beatus Aloisius Guanella in loco Fraciscio, ex parte municipii vulgo

Campodolcino dioecesis Comensis, die 19 mensis Decembris anno 1842, ortus

est. Adulescens in dioecesanum Seminarium est ingressus et, expleto itinere

institutionis, die 26 mensis Maii anno 1866 ordinem presbyteralem accepit. In

ingenti pastorali ministerio fervore eminuit et apostolica caritate. Parochus

nominatus in Pianello Lario, sumpsit et extulit experientiam coetus puella-

rum ad pauperes iuvandos consociatarum: quae primum constituent nucleum

Instituti Filiarum a Sancta Maria Providentiae.

Praeter hanc Congregationem femininam, beatus Guanella coetum etiam

sacerdotum congregavit quos ''Servos a Caritate'' appellavit. Romae ecclesi-

am construxit, cui adnecti voluit Piam Unionem Transitus Sancti Ioseph,

cuius sanctus Pius X primus sodalis voluit esse inscriptus. Septuaginta annos

natus navi evectus ad Foederatas Civitates Americae Septentrionalis appulit

ut auxilium migrantibus afferret; ac deinde ipsemet illis auxilium praestitit

qui Aprutii motu terrae sunt concussi. Ob senectutem, ob ingressum Italiae

in primum bellum mundiale, ob laborem aliquot confratrum in fronte aciei,

infirma corruit valetudo Beati, qui die 27 mensis Septembris anno 1915

paralysi est correptus ac die 24 sequentis mensis Octobris pie in Domino

obdormivit. Summus Pontifex Paulus VI anno 1964 in Beatorum numerum

eum rettulit.