Congregatio de Causis Sanctorum 539

De hoc nuntio prorsus acerbo certior facta, aegrota primo instanti

comprehensibili affecta est perturbatione; sed statim postea animo se

refecit et consilium cepit sanationem exspectandi, intercessioni se

relinquens Venerabilis Servi Dei Iustini Russolillo. Eundem Servum Dei

invocaverunt frater, consobrina, pueri scholae maternae, sorores

vocationistae, patres vocationistae variique fideles paroeciae ad quam

aegrota pertinebat. Cyclo therapeutico nondum expleto ac funestis

effectibus pathologicis persistentibus, quibus describebatur incrementum

morbi omnimode infaustum, status clinicus patientis plenam gravissimae

ac iam provectae formae neoplasiae repentine ostendit solutionem, quae

celeriter et absolute evenit. Evidens apparuit congruentia chronologica,

confirmata ab expertis ab inspectione, ac nexus inter invocationem ad

Servum Dei et sanationem aegrotae Meloro, quae deinceps bona usa est

valetudine et suetam relationis vitam gerere potuit.

De hoc eventu, qui mirus est habitus, instructa est Inquisitio Dioecesana

apud Curiam Patersonensem, Novae Caesareae in USA, a die 14 mensis

Novembris anno 2004 ad diem 31 mensis Octobris anno 2005, cuius iuridicam

auctoritatem approbavit haec Congregatio Decretum edens die 9 mensis

Martii anno 2007. Medicum Dicasterii Consilium, in Sessione diei 18 mensis

Iunii anno 2009, agnovit sanationem ex scientia medica inexplicabilem fuisse.

Die 12 mensis Decembris anno 2009 habitus est Congressus Peculiaris

Consultorum Theologorum, qui favorabilem tulerunt sententiam, quae con-

firmata est die 1 mensis Iunii anno 2010 a Patribus Cardinalibus et Episcopis

in Sessione Ordinaria congregatis, Ponente Causae Exc.mo D.no Lino Fuma-

galli, Episcopo Sabinensi-Mandelensi.

Et in utroque Coetu sive Consultorum sive Cardinalium et Episcoporum,

posito dubio an de miraculo divinitus patrato constaret, responsum affirma-

tivum prolatum est.

Facta demum de hisce omnibus rebus Summo Pontifici Benedicto XVI

per subscriptum Archiepiscopum Praefectum accurata relatione, Sanctitas

Sua, vota Congregationis de Causis Sanctorum excipiens rataque habens,

hodierno die declaravit: Constare de miraculo a Deo patrato per intercessionem

Venerabilis Servi Dei Iustini Mariae Russolillo, sacerdotis dioecesani et parochi,

Fundatoris Societatis Divinarum Vocationum, videlicet de celerrima, perfecta

et constanti sanatione nubilis Caietaninae Meloro a ''carcinoma squamoso

primitivo della vagina in stadio avanzato (3b FIGO)''.