Acta Benedicti Pp. XVI 511

CONSTITUTIONES APOSTOLICAE

I

TORONTINA

In Canada nova Chaldaeorum eparchia conditur, Sancti Addai in urbe Torontina

appellanda.

BENEDICTUS EPISCOPUS

servus servorum dei

ad perpetuam rei memoriam

Qui regimen exercemus universae catholicae Familiae, curam adhibere

non omittimus de singulis Ecclesiis toto terrarum orbe constitutis. Itaque

Filiis Nostris de ritu Chaldaico consulere exoptantes, qui labente temporis

cursu, varias ob necessitudines propriis regionibus relictis, novam residentiae

et operis sedem in hospitalibus Canadae terris invenerunt, bene fieri

censuimus, si, iuxta preces Congregationis pro Ecclesiis Orientalibus nova

inibi circumscriptio ecclesiastica pro illis constitueretur. Qua re, praehabito

consilio Venerabilis Fratris Nostri Patriarchae Babylonensis Chaldaeorum,

una cum eius Synodo, itemque annuente Conferentia Canadae Episcoporum,

necnon audito Venerabili Fratre Petro López Quintana, Archiepiscopo titulo

Acropolitano atque in ea Natione Nuntio Apostolico, aliisque quorum

interest, Apostolica Nostra ex potestate, pro fidelibus Chaldaici ritus in

Canada commorantibus novam eparchiam Sancti Addai in urbe Torontina

condimus cuiusque eparchialem sedem Toronti ponimus, cum omnibus

iuribus et obligationibus tali novae condicioni inhaerentibus, ad normam

Canonum Ecclesiarum Orientalium Codicis, Quae iussimus ad effectum rite

adducantur deque absoluto negotio sueta documenta exarentur et

Congregationi pro Ecclesiis Orientalibus mittantur. Hanc denique

Apostolicam Constitutionem iugiter ratam esse volumus, contrariis rebus

nihil obstantibus.