Acta Apostolicae Sedis - Commentarium Officiale538

PUTEOLANA

Beatificationis et Canonizationis Ven. Servi Dei Iustini Mariae Russolillo, Sacer-

dotis dioecesani Fundatoris Societatis Divinarum Vocationum (1891-1955)

DECRETUM SUPER MIRACULO

Venerabilis Servus Dei Iustinus Maria Russolillo die 18 mensis Ianuarii

anno 1891 Neapoli natus est in loco vulgo Pianura, dioecesis Puteolanae.

Familiaris aura penitus christiana insigniter contulit in educationem et

culturalem formationem Iustini, qui propediem apud aequales ingenio non

communi, peculiari proclivitate ad studium, docili animo ac pietate vere

singulari eminuit. Cum inde ab infantia ad sacerdotium vocari adverteret,

studia peregit humanistica et theologica, ac die 20 mensis Septembris anno

1913 sacro presbyteratus ordine auctus est. Ob suum pastoralem fervorem in

opus catecheticum et promotionem vocationalem maximopere incubuit. Die

18 mensis Octobris anno 1920, quibusdam superatis difficultatibus, Servus

Dei fundamenta iecit ''Societatis Divinarum Vocationum'', quae in ramum

masculinum, in ramum femininum necnon in institutum saeculare successive

est distributa. Propter opera sua vocationalia ac praesertim propter aposto-

licam missionem intentam ad rehabilitandos sacerdotes, incomprehensiones

et iniurias pati debuit. Sua in terra natali animam exhalavit die 2 mensis

Augusti anno 1955. Summus Pontifex Ioannes Paulus II die 18 mensis

Decembris anno 1997 virtutes eius heroicum in gradum exercitas approbavit.

Ad eius quod attinet beatificationem, Postulatio Causae huic Congrega-

tioni de Causis Sanctorum assertam miram porrexit sanationem mulieris

nubilis Caietaninae Meloro, patratam anno 1998 Patersonia in urbe, Novae

Caesareae in USA. Historia clinica infirmae, aetatis 59 annos agentis, incipit

die 12 mensis Ianuarii anno 1998, nempe cum, amissiones haematicas ex

externis genitalibus subiens, examini medico subiecta est. Medicus gynaeco-

logus detexit quandam vaginalem voluminosam tumefactionem ex dimensio-

ne mali citrei. Post biopticam detractionem, sub lumine examinis histologici

et examinis clinici, infausta edita est diagnosis ''carcinomatis'', quod aliquot

post dies ob laesionem squamosam intraepithelialem aggravatum est.

Aegrota quibusdam submissa est chimiotherapicis et radiotherapicis curis,

prius externis, deinde internis.