ARTICULUS V.

Post hunc sumpserunt quintum, et illum his verbis declaraverunt, dicentes : Et resurrexit tertia die secundum Scripturas. Et de descensu quidem ad inferos dimiserunt : quia circa illud error nullus erat: sed et erat contentio de resurrectione, quibusdam dicentibus, quod non tertia die Christus resurrexit : quia non tribus diebus in sepulcro jacuit, Parasceve enim in nocte sepultus, non jacuit nisi per sabbatum, et ante lucem Dominicae diei resurrexit: et ideo ut hanc determinarent contentionem, dixerunt quod resurrexit tertia die secundum Scripturas, hoc est, sicut illos tres dies Scriptura docet computare. Haec enim, ut dicit Augustinus, per synecdochen partem computavit pro toto, ita quod pars Parasceves quando sepultus est et

mortuus, cum praecedente parte diei et tota praecedente nocte computatur pro uno die naturali : et nox quae est inter Parascevem et sabbatum, cum ipso sabbato pro uno die computatur : et vespere sabbati cum nocte sequenti pro una die Dominica computentur, quia semper vespera praecedens cum die sequenti ad unam partem pertinebant. Genes. I, 5 : Factum est vespere et mane dies unus. Quare autem artificialibus duabus noctibus et uno die artificiali Christus in sepulcro jacuit, hanc causam assignat Augustinus : quia scilicet in Christo non sunt tenebrae, dies clara suam claram mortem signat. In nobis autem qui tenebrosi sumus, duae mortes, peccati

scilicet et poenae, significantur per duas noctes, quas Christus sua lucidissima morte ad lucem gratiae reduxit. Psal. CXXXVIII, 11 : Nox illuminatio mea in deliciis meis. Michaeae, VII, 8 : Cum sedero in tenebris, Dominus lux mea est. Matth. XII, 39 et 40, dixit, hoc esse signum paenitentium, qui a duplici nocte vel morte per mortem Christi quaerunt liberari. Generatio mala et adultera signum quaerit, et signum non dabitur ei, nisi signum Jonae Prophetae. Sicut enim fuit Jonas in ventre ceti tribus diebus et tribus noctibus, sic erit Filius hominis in corde terrae tribus diebus et tribus noctibus.