ARTICULUS X.

Deinde tractantes articulum decimum dixerunt : Confiteor unum baptisma in remissionem peccatorum. Apostolus autem dixerat, remissionem peccatorum, et addidit ad expressionem sancta synodus : Confiteor unum baptisma : quia non remittuntur peccata nisi per Christi sacramenta, quorum janua et fundamentum est baptismus, et ideo baptismus ut fundamentum in omnibus aliis remissionem operatur. Joan. III, 5 : Nisi quis renatus fuerit ex aqua et Spiritu sancto, noti potest introire in regnum Dei.

Dicunt autem unum baptisma, ut innuatur unum esse baptisma Christi, et non secundum numerum baptistarum baptismata numerari. Quidam enim dixerunt, quod baptismus ab uno melior est quam ab alio. Contra quod dicit sancta synodus : Confiteor unum, id est, aequalis valoris baptisma, quod Christi est baptisma in forma Ecclesiae celebratam : hoc enim unum est baptisma et aequale, sive detur a bono, sive malo : quia baptizans est sicut minister : Dominus autem est Christus, qui aequaliter dat per bonum et malum baptistam. Unde Augustinus super Joannem : "Quid facit ibi minister malus, ubi bonus est Dominus ? " Quasi diceret : Nihil. Christus enim est, qui baptizat interius, etiam quicumque baptizet exterius. Joan. I, 33 : Qui me misit baptizare in aqua, ille mihi dixit : Super quem videris Spiritum descendentem, et manentem super eum, hic est qui baptizat in Spiritu sancto. Et sic baptismus est unus unitate formae, et unitate interius baptizantis.

Quod autem dicitur : In remissionem peccatorum. Act. I, 5 : Joannes quidem baptizavit aqua, vos autem baptizabimini Spiritu sancto non post multos hosdies. Act. XIX, 4 : Joannes baptizavit baptismo paenitentiae populum, dicens in eum qui venturus esset post ipsum ut crederent, hoc est, in Jesum. Et infra, v. 5 et 6 : His auditis, baptizati sunt in nomine Domini Jesu. Et cum imposuisset illis manus Paulus, venit Spiritus sanctus super eos.