Quaestio Quinta. An Angelus ad similitudinem et imaginem Dei factus sit.

80. Hujus quoque quaestionis solutio a I et II quaestionis ac secundae praesertim solutione derivatur. Si enim similitudinem et imaginem in gratiae donis colloces, quis ad similitudinem et imaginem Dei factos esse Angelos neget, cum hi in ipsa creatione 0877A uberrimis amplissimisque gratiae donis ditati sint: et ea de causa Filii Dei appellati ? Ad imaginem Dei pariter factos dices, si imaginem in spiritu, illiusque potentiis, ac sublimibus qualitatibus pones. Nam haec procul dubio non modo in Angelis sunt, verum etiam in his excellunt, et praestant. Hac, ut arbitror, de causa non modo Angelum ad imaginem Dei factum, verum etiam excellentiori quadam ratione ad eamdem imaginem factum docet Gregorius Magnus, cujus verba referre hic placet (lib. XXXII Moral. cap. 18) . Scilicet ad diabolum referens quod Ezechiel de rege Tyrio ait: Tu signaculum similitudinis Dei, haec subjicit: «De sigillo quippe anuli talis similitudo imaginaliter exprimitur, qualis in sigillo eodem essentialiter habetur. Et licet homo ad Dei similitudinem creatus 0877B sit, Angelo tamen quasi majus aliquod tribuens, non eum ad similitudinem Dei conditum, sed ipsum signaculum Dei similitudinis dici, ut quo subtilior est natura, eo in illo similitudo Dei plenius credatur expressa.»

0878A 81. At si vel in ea perfectione, et excellentia collocas, quam numero 46, et subsequentibus exposui, vel expresse in dominio supra caeteras creaturas, procul dubio ab Angelis ea arcenda est, ideoque imago Dei, de qua agimus.

Sane Theodoretus (quaest. XX in Gen.) in eo totus est, ut eam imaginem ab Angelis arceat, et in solo homine statuat. Ad quem quidem finem cum alias rationes afferat, tum hanc sane, quod Angelus in creaturas reliquas nullam exercet potestatem, quam tamen maximam exercet homo. Sed ipsa Theodoreti verba referre praestat, ex quibus scilicet ea, quae diximus, lector per se percipiat, «Quidam ad imaginem Dei hominem creatum esse arbitrantur secundum potentiam animae invisibilem, non intelligentes, quod et 0878B Angelus invisibilis est, sicut et Daemon . . . . Quod si solus homo ex omnibus creaturis imago Dei est, peculiarem quamdam rationem hujusce denominationis oportet esse, etc.»

Atque hic III dissertationi finis sit.