347. (4. ) In Epiphania Domini.

1 a. Regi nato, quem decorus Dedit incorruptae thorus, Psallat corde noster chorus Et ore supplici,

1 b. In hac die laudis mirae Nos dignetur exaudire, Quam dignatur insignire Honore triplici.

2 a. In hac enim adoratur, In Iordane baptizatur, Aqua vinum consecratur Divino munere.

2 b. Stella solem declaravit, Praeco verbum baptizavit, Aquam vinum dulcoravit Mutato genere.

3 a. Reges regem veritatis

Tres adorant tribus datis, Trina fidem trinitatis Signat oblatio.

3 b. Confitentur enim pure Regem auro, Deum ture, Murram dedit sepulturae Mira devotio.

4 a. Lavit plasma plasmatorem, Lavit mundus mundiorem, Lavit sanctus sanctiorem, Fontem in flumine.

4 b. Sed quis lavit et quem ? Deum Homo, servus regem, eum, Qui redemit suum reum Proprio sanguine.

5 a. Novum opus et divinum ! Aqua coepit esse vinum, Conditorum se dominum Ostendit conditor,

5 b. Dum factum est, ut imperat, Dum diversa confoederat Et naturam rege[ne]rat Naturae genitor.

6 a. Stella duce speciali Ducem quaerunt Principes Sabaei,

6 b. Aurum regi, sed mortali Murram ferunt, Tus filio Dei.

7 a. Imperator a milite Coronatur,

Christus a Iohanne;

7 b. Diva perunctus alite Baptizatur

In Iordanis amne.

8 a. Formam ponit elementum, Quam dederat Prima nativitas,

8 b. Dum mutatur in pigmentum, Quae fuerat

Legis austeritas.

9 a. Et nos ergo mente pari Reges istos imitari Sicque trinum venerari Deum studeamus,

9 b. Aurum in sapientia,

Tus in precum flagrantia, Carnis in abstinentia Murram offeramus.

10a. Ut nos perfundat radio, Quem magorum consilio Inspiravit indicio Stellae clarioris

10 b. Et nos per suam gratiam Visitatos ad patriam Viam ducat per aliam Vitae melioris.

11 a. Et qui liber a crimine, Sacro respersus flamine, Mundi crimen in flumine Detersit hodie,

11b. Nos expurget a peccatis Et antiquae vetustatis Labem tollat a reatis Baptismo gratiae.

12 a. Et ut aquam contra morem Vini vertit in liquorem, Ita suae per amorem Misericordiae

12 b. Nostris malis nos exuat, Fide sua nos imbuat Et aeternalis induat Splendore gloriae.