356. (13. ) De sancto Remigio.

1 a. Oremus omnes pariter, Imploremus humiliter,

Ut haec, quam nostra contio

1 b. Voce profert laetabunda, Deo nostro sit iucunda Decoraque laudatio.

2 a. Christi namque confessoris Nostri vox resultat oris Gloriosa praeconia,

2 b. Cuius doctrina, moribus Et exemplorum floribus Sancta vernat ecclesia.

3 a. Huic in Laudunensi pago Felix ortus et propago Clara parentum serie;

3 b. Laudunensi pago natus Fuit, sed praedestinatus Pater Remensi patriae.

4 a. Princeps hic praesulum Francorum populum Prius incredulum, Super quem zabulum Regnare repperit,

4 b. Eo, quod impio De sub dominio Raptum remigio Praedicatorio Prudenter traxerit

5 a. Ad portum gratiae, Datos perfidiae Reddens iustitiae Navis ecclesiae Rector egregius.

5 b. Fuit divinitus Antequam genitus Nomine cognitus Et sacra proditus Voce Remigius.

6 a. Claret ab exordio Sancta conversatio, Deitatis munere Signa coepit agere, Dum adhuc nutricio Penderet ab ubere.

6 b. Quo nutritus fuerat,

Lacte matris reserat

Liniendo loculos

Oculorum oculos

Eius, qui praedixerat

Ortus sui titulos.

7 a. Necdum adoleverat Cum, sicut didicerat, Se subtraxit populo, Retraxit a saeculo Pedem, quo vix steterat In eius vestibulo.

7 b. Declaratur pontifex Et salutis opifex Spiritali lumine Perfusus et unguine, Fitque sacer sacrifex Coram sacra virgine.

8 a. Captum mente,

constrictum vinculis Inopiae,

carentem oculis, Verbo solvit, recreat epulis, Decorat lumine.

8 b. Sic unitas

summa per famulum, Trinitatis

cultorem sedulum, Operatur

uno miraculum

Trinum in homine.

9 a. Conflagrantis

urbis Remensium Se dans globis

flammarum, ovium Sedat ignes,

sed et daemonium Puellae nobilis

9 b. Fugat fusis

ad Deum precibus Et mox mortis

addictum legibus Redivivam

reddit parentibus, Ob hoc plus humilis.

10 a. Christus chrisma paradisiacum Misit ei,

cum Parisiacum Regem Deo

sacravit una cum Regis militia,

10 b. Inimicos

crucis exsuperans Et sanguine

Christi confoederans, Generatos

morti regenerans Ad vitae praemia.

11a. 0 Francorum

gentis apostole, Super ea,

quam Deo subole Lucratus es, affectu condole Paterni pectoris

11b. Et in huius

mundi naufragio Fluctuantes

tuae remigio Sanctitatis refove gaudio Superni littoris.

12 a. Sancte pater

et venerabilis, Digne praesul

et admirabilis, Esto clemens et exaudibilis Tuis supplicibus,

12 b. Ut per tibi

concessam gratiam Apud Christi

misericordiam Invenire

possimus veniam Nostris excessibus.