355. (12. ) De sancto Lupentio.

1. Christo nostra devotio,

Sacro flagrans spiramine, Laudis excelsa gloriam Voce resultet hodie, Qui certanti Lupentio Sancto pro suo nomine Concessit et victoriam Et praemium victoriae.

2. Hic dum pro vitae merito Dignum et acceptabile Regi regum exhiberet Sacerdotis officium, Agone mortis inclito

Nactus tropaeum nobile, Declaravit, quod haberet Regale sacerdotium.

3. Qui Brunichildis impiae Comprehensus malitia, Iussa cuius hostiliter

Fervebant contra Dominum, Pro amore iustitiae Poenas in patientia Superavit alacriter

Caesus a viris sanguinum.

4. Huic dura nocturno tempore Robdo simul et Augminus Degeneri militia

Nudatis instant ensibus, Caput truncant a corpore, Sed, ut occultent facinus, Gravi pressum materia

Trudunt utrumque fluctibus.

5. In laudem Christi militis Duplex ibi mirabile Divinitatis munere

Datur eidem tempori: Nam de profundo gurgitis Caput refert pes aquilae, Corpus obrutum pondere Reportat unda littori.

6. Tunc repertores partium Movet pia contentio

Super diversis partibus, Quae cui reddi debeat. Tandem Deum timentium Mediante consilio

Placet, ut pulsis litibus

Caput ad membra redeat.

7. Iste martyr egregius

Dignus laude fidelium, Cuius Deus exaudiat Insistentes praeconiis, Gregem istum Lupentius Orando spiritalium

Nunc et semper custodiat A luporum insidiis.