1. De ss. Trinitate.

la. Gloria tibi, trinitas,
Cujus larga nos bonitas
Illustravit gratia:

1b. Tibi laus, decus, potestas,

Te majestatis honestas

Decet et victoria.

2 a. Tu ergo, factor omnium,
Coelorum, terrae, marium,
Vera sapientia:

2 b. Tu Deus admirabilis
Ac Incomprehensibilis
Comprehendis omnia.

3 a. Tu virtus, magnanimitas,
Mansuetudo, humilitas
Tuque patientia;

3 b. Tu fortis, justus et pius,
Mitis, clemens, propitius,
Tu misericordia.

4 a. Tu lux lucem Illuminans,
Noctem, diem conterminans
Signa per disparia ;

4b. Tu qui tempora momenta
Mutas, per te elementa
Se sunt complectentia.

5 a. Tu vita, via, veritas,
Omnipotens tu caritas,
Fides, spes et gratias

5 b. Tu turris fortitudinis,
Unica spes solaminis
Nobis In miseria.

6 a. Fons ergo tu bonitatis,
Vultu cerne pietatis
Vota te quaerentia;

6 b. Da veniam pro peccatis,
Solve nostrae vetustatis
Juga nos prementia.

7. O veneranda trinitas,
O adoranda unitas,
O vera clementia.